Downsizing: هل ممكن نعيش بحجم أصغر؟
أفكار كتير في حياتنا المعاصرة ظهرت في البداية كمجرد أفكار فنتازية في الأفلام، ومع الوقت تحولت لواقع وحقيقة بنعيشها، هل ممكن فيلم النهرده يكون إشارة لفكرة جديدة ممكن توفر كتير على البشرية؟ تعالوا نتعرف أكتر على Downsizing
القصة
الفيلم بيحكي عن بول سافرانيك الرجل الأمريكي اللي بيعيش حياة تقليدية وهادئة، لكنه بيسمع في أحد الأيام عن عملية تقليص البشر، لتوفير مكان للحياة على الكوكب، وكمان لتوفير نفقات الحياة والقدرة على عيش حياة رفاهية بأمكانيات قليلة. وبالفعل بيخضع للعملية، الأمر اللي بيدخله في سلسلة من المواقف الكوميدية اللي مش بتنتهي.
فريق العمل
الفيلم من سيناريو وحوار وإخراج ألكسندر باين أما البطولة فكانت لـ كريستين ويج و هونج تشاو و مات ديمون و كريستوف والتز و لورا ديرن و جيسون سوديكس
الأداء التمثيلي
من الواضح أن مات ديمون بيحاول يقدم توزيعات مختلفة من ناحية الأداء التمثيلي، على الرغم من تركيزه في الفترة اللي فاتت على أفلام الأكشن، لكن واضح أنه بيطرق باب أفلام الخيال العلمي والفانتازيا بقوة زي تقديمه لفيلم The Martian على سبيل المثال.
الأداء التمثيلي لباقي الأبطال هو كمان كان جيد وكان واضح تركيز المخرج على أنه يخرج من كل الأبطال بأقصى ما يمكن من قدرات تمثيلية علشان يحول كل مشهد اما لمشهد جاذب للمشاهد ومثير له، أو مشهد كوميدي ومثير للخيال.
السيناريو والحوار والأخراج
سيناريو الفيلم بيتسم بالسرعة والأحداث المتلاحقة، خاصة في النصف الثاني من الأحداث، وتم توظيف المؤثرات الخاصة لخدمة قصة وفكرة الفيلم بالمقام الأول، وده في رأينا واحد من أكتر الأفلام اللي قدرت توظف المؤثرات الخاصة مش بس علشان تبهر المشاهد بصريا، لا كمان علشان تخدم القصة وسيناريو الفيلم.
الديكورات والموسيقى والأزياء
ديكورات الفيلم لعبت دور مهم علشان نعيش داخل الأحداث، وتكاملت مع المؤثرات الخاصة في خدمة الفيلم، على العكس من الموسيقى التصويرية اللي حسينا أنها كانت ضعيفة وتستحق تكون أفضل وأقوى.
الخلاصة
فيلم Downsizing مناسب لمحبي أفلام الخيال العلمي والفانتازيا، ولمحبي أفلام مات ديمون بشكل عام.
علشان تبقى عارف:
تقييم الفيلم على موقع IMDB 5.7 من 10
