Drunk Parents : مش أي حد يعمل كوميديا كويسه
على الرغم من أن بعض أشهر الأسماء في هوليود حاولت تقدم سينما كوميدية، إلا أن اللون ده من الفنون مش من السهل تقديمة، على الرغم من أن كتير من المشاهدين بيحسبوا ان الأدوار الكوميدية سهل ان أي ممثل يقوم بها. ويمكن دي كانت من الأمور اللي وضحها عملاق الكوميديا جيم كاري لما قال ان الفنان الكوميدي يعمل أي دور. لكن مش أي فنان يقدم يعمل دور كوميدي!
فيلم Drunk Parents بيحكي عن أبوين مدمنين خمور. بيحاولوا يوفقوا أوضاعهم المالية المنهارة من خلال سلسلة لا تتوقف من المشاهد الكوميدية. لكن المشكلة الأساسية في الفيلم كانت رغبة صناعة في تقديم الكوميديا. لكن الفيلم في النهاية فشل في اضحاكنا كمشاهدين.
سلمي حايك وأليك بالدوين أبطال الفيلم ثنائي تمثيلي متميز وقوي. لكن الثنائي ده مش قادر يقدم كوميديا جيدة. قد يكون السبب إخراج فريد وولف أو تأليفه للفيلم لكن بشكل عام نقدر نقول أن مسئولية فشل الفيلم – من الناحية الكوميدية – تطال الجميع من حيث التأليف أو الإخراج أو التمثيل.
ويمكن السبب الرئيسي في حالة الاستسهال اللي حسينا بيها في الفيلم هي المراهنة على الكيمياء بين ابطال الفيلم. الرهان اللي كسب في البداية لكن لا يمكن يُعتمد عليه علشان ينجح فيلم كامل. وعلى الرغم من قوة أداء سلمى حايك. لكن شكل الشخصية نفسه وطريقة تقديمها على الشاشة ظلمتها وجعلت أدائها يبان باهت وغير قوي.
Drunk Parents أكيد مش أسوأ فيلم كوميدي شوفناه في حياتنا. لكن كمان خلونا نتفق أنه مش أحسن فيلم كوميدي هاتشوفوه. وننصح بمشاهدته للناس اللي عاوزه تقضي وقت لطيف مع فيلم مش معمول علشان يفضل في ذاكرتهم بعد المشاهدة الأولى.
