Dumbo : السينما تخلي الفيل يطير!
من أحلى الحاجات اللي بتعجبنا في السينما. هي قدرتها على اختراق الحواجز واسقاط الفرق بين الحقيقة والخيال. خاصة مع التقدم التكنولوجي الكبير اللي صاحب عمليات الخدع والمونتاج اللي بتحصل للأفلام واللي جعلت أي شيء ممكن يحصل على الشاشة. حتى لو كنا عاوزين نخلي الفيل… يطير!
فيلم Dumbo هو إعادة انتاج لفيلم بيحمل نفس الإسم من انتاج الاربعينات. عن فيل صغير الحجم نسبيا لكن عنده ودان كبيرة. ولما بيكتشف مجموعة من الأطفال قدرة الفيل على الطيران. بتتحول الأحداث 180 درجة وبتحصل مفارقات كوميدية وغير كوميدية مذهلة.
مخرج الفيلم تيم بيرتون من الواضح أنه متخصص في انتاج أفلام انيميشن أو أفلام معتمدة على الخدع والمؤثرات البصرية بشكل كبير. ويكفي انه المنتج والمخرج لفيلم Frankenweenie واللي بيعتبر من الأفلام المهمة والمؤثرة جدا.
من المميز في الفيلم انه بيجمع بين مجموعة من الممثلين المميزين زي ايفا جرين ومايكل كيتون و كولن فاريل و داني ديفيتو. وداني ممكن مايكونش واحد من أشهر ممثلين هوليود لكن واحد من أكثرهم موهبة وقدرة على الأداء التمثيلي. لا ننسى له دوره المميز في الفيلم التسعيناتي Jack the Bear.
المؤثرات والخدع السينمائية في الفيلم لعبت دور مهم جدا علشان يخرج الفيلم بشكله النهائي المميز. وعلشان تقدم لنا شخصية (دامبو) بالشكل الجميل والجذاب ده.
الموسيقى التصويرية والديكورات هي كمان لعبت دور مهم بالتزامن مع زوايا التصوير والألوان على الشاشة علشان تقدم لنا في النهاية كرنفال من الموسيقى والألوان على الشاشة بشكل يخطف أنظارنا بشكل جيد جدا.
فيلم Dumbo فيلم جميل بيجمع بين المؤثرات الخاصة والأداء التمثيلي الراقي قادر يخطف الإنتباه ويشد العين.
