Early Man: في الاتحاد قوة
الجميل في بعض الأفلام الموجهة للأطفال بالمقام الأول، إن بيكون فيها رسايل خفية موجهة للكبار كمان، ودي من أمتع الحاجات اللي بتصادفنا في مشاهدة أفلام الأطفال ومنها فيلم Early Man
القصة
الفيلم بيحكي عن عصور ما قبل التاريخ، لما بيحاول بطلنا انه يوحد قبيلته ضد عدو قوي وغاشم وممكن يسبب خطر لكل القبيلة بتاعته. فا هل هايقدر فعلا يوحد قبيلته ويحقق هدفه ولا هايفشل في اللي بيحاول يعمله؟
فريق العمل
الفيلم من اخراج نيك بارك وتأليف مارك بيرتون وبطولة الأداء الصوتي لـ تيموثي سبال و ريتشارد ايواد و مارك ويليامز و كيفن ماتادين
الأداء الصوتي
الأداء الصوتي للأبطال كان جيد ومعبر عن الشخصيات اللي بيقوموا بيها، ودي من أصعب الأدوات اللي لازم الممثلين يملكوها، وهي قدرتهم على توصيل كل مشاعرهم من خلال أصواتهم فقط بدون أي أدوات تانية.
السيناريو والحوار والأخراج
سيناريو الفيلم جميل ويشد المشاهدين لمتابعته على اختلاف أعمارهم وأفكارهم، أما الحوار فكان متكلف شوية لكن من ناحية تانيه كان فيه بعض الجمل الكوميدية الجميلة والل أضفت روح الكوميديا على الفيلم.
التصميم والموسيقى والتحريك
تصميم الشخصيات في الفيلم ممكن تكون غريبة شوية على عيوننا أو نكون مش متعودين عليها، وكمان نظام التحريك ممكن نكون مش متعودين عليها هي كمان، لكن النتيجة النهائية كانت جيدة وجميلة وجديدة على الأطفال والكبار على حد سواء.
الخلاصة
فيلم Early Man من الأفلام الخفيفة المناسبة للكبار والصغار على حد سواء.
علشان تبقى عارف:
تقييم الفيلم على IMDB 6.4 من 10
