Endless Love: فيلم فى التوقيت المناسب
مين قال أن توقيت طرح الأفلام مش بـ يفرق فى تقييمنا لها؟ تعالوا نتفق أن السنة دى بشكل خاص أعياد الحب كان لها وقع وطابع أقوى من باقى السنين اللى فاتت، يمكن بسبب المشكلات اللى بـ نمر بها مؤخرًا فى مصر سواء كانت اجتماعية أو سياسية أو حتى مادية، ده بـ يخلى بحثنا عن القيم الأسمى وعلاقات الحب تكون أقوى.
المهم أن Endless Love تم طرحه فى توقيت ذكي خلى عندنا قابلية أقوى لمشاهدته ونقده، لكن لو بـ نتكلم عن المستوى الفنى فقط نعتقد أن تقييمنا له كان هـ يقتصر على نجمتين فقط بدل 3 نجوم.
من إخراج شانا فيستى وبطولة أليكس بيتيفر، وجابريل وايلد وبروس جرين وود وغيرهم، بـ نشوف قصة تقليدية عن علاقة حب بـ تجمع بين فتى فقير وبنت غنية، بـ يحاولوا يكونوا مع بعض طوال الوقت رغم كل الصعوبات اللى بـ تقابلهم من الأهل، قصة الحب التقليدية اللى شوفناها فى أفلام كثير قبل كده يمكن المختلف المرة دى هو توقيت العرض واشتياقنا لفيلم رومانسى بعد فترة مش قليلة من التركيز على الأكشن والتراجيديا.
بعيدًا عن توقيت طرح الفيلم، ما كانش عندنا إحساس بقوة فى أداء أبطال الفيلم، طوال الوقت سيطر على الفيلم حالة من “العادية” على الرغم من محاولات الإخراج تغليف الأمر بصورة أسطورية عملاقة، وفى رأينا لو كان التركيز أكثر على تفاصيل العلاقة وعدم إكساب الموضوع نوع من الأسطورية كان هـ يكون أقوى وأحسن.
الموسيقى التصويرية والديكور كانوا فى المستوى التقليدي العادي، ما حسيناش أن كان فيه إضافة قدموها للعمل، يمكن بعض المقاطع الموسيقية فى المشاهد العاطفية كان قوى لكن ده ما يخليناش نقول أننا سمعنا شىء أسطورى أو أفضل من باقى الأفلام اللى بـ تدور فى نفس التصنيف.
Endless Love فيلم مناسب لأن تم طرحه فى توقيت مناسب، ننصحك تشوفه قبل حالة “الحب” اللى حلت مع عيد الحب تروح.. لأنك لو شوفته بعدها ممكن تلاقى حاجات كثير مش هـ تعجبك.