Escape Plan 2: Hades : فن الهروب من السجن
واضح أن هوليود قررت تعيد استغلال كل الأفلام اللي بتحقق نجاح تجاري علشان يتم تقديم أجزاء جديدة منها، في محاولة من منتجيها لتحقيق مزيد من النجاح.
من فترة شوفنا فيلم Escape Plan في الجزء الأول منه، وشهد الفيلم تعاون سيلفستر ستالون مع أرنولد شوارزنيجر، في تعاون فكرنا بكلاسيكيات السينما التجارية الناجحة زي فيلم tango and cash اللي كان من بطولة سيلفستر برضو.
في Escape Plan 2 بنشوف مهمة جديدة لراي برسلين خبير الهروب من السجون وتأمينها، واللي بيكون فريق من المتخصصين في مجال دراسة ثغرات السجون وكيفية الهروب منها، لكن اعتقال واحد من الفريق بيقلب الموازين وبتبدأ معاه سلسلة جديدة من عمليات الهروب من السجون.
على الرغم من تقدم سيلفستر ستالون في العمر الا انه لسه قادر على أداء أفلام الأكشن ببراعة مميزة، كمان على مستوى الأداء التمثيلي ستالون قادر يعطينا انطباعات إنسانية جيدة جدا، على الرغم من أن سيناريو الفيلم وقصته اللي كتبها مايلز تشابمان مش بتعطي كتير من الوقت أو الفرص لاظهار العواطف والمشاعر الإنسانية.
اخراج ستيفن سي ميلر للفيلم كان جيد، وميلر أعطى كتير م الوقت والمجهود لاخراج مشاهد الاكشن، والحقيقة أن مجهوداته جت بنتيجة كويسة لأن محبي الأكشن هايلاقوا في الفيلم ضالتهم من خلال مجموعة كبيرة من مشاهد الالتحام والمطاردات.
على الرغم من قوة الموسيقى التصويرية الا انها كانت اضعف عوامل الفيلم من وجهة نظرنا، أما ديكور السجن والمجهود اللي تم بذله علشان يخرج بصورته النهائية فمجهود يستحق الثناء وكانت نتيجته النهائية قوية ومميزة.
Escape Plan 2 فيلم لعشاق أفلام الهروب من السجون ومحبي النوستالجيا الخاصة بأبطال أفلام أكشن التسعينات. نرشح لهم الفيلم بقوة للمشاهدة.
علشان تبقى عارف: تم تصوير الفيلم في حوالي 20 يوم فقط
