Escape Plan: The Extractors : راحت على سيلفستر ستالون ولا ايه؟!

لما تكون ممثل شاطر. بتفهم كويس إنك ممكن تعمل أي حاجه غير إنك تخدع الزمن. سيلفستر ستالون لازم يفهم إنه مابقاش قادر على نفس الأداء الجسدي اللي قدمه في أفلامه الشهيرة السابقة.

لكن فنانين كتير مروا باللي مر بيه سيلفستر. لكن مكانش عندهم نفس العند والتصميم على تقديم نفس نوعية الأدوار.

Escape Plan: The Extractors هو الجزء الثاني من سلسلة أفلام بتحكي عن راي بريزلين (سيلفستر ستالون) المتخصص في تكنيكات الهروب من السجون، واللي المفروض يواجه في كل فيلم عملية هروب من سجن صعب الخروج منه. الجزء الأول كان ممتع والفكرة كانت جديدة والنجاح كان كبير. لكن الجزء الثاني من السلسلة دمر كل حاجه حلوة قدمها الفيلم في الجزء الأول!

فكرة الهروب من السجن ما أصبحتش هي العنصر الأساسي في القصة وده ضايقنا. المرة دي بنشوف قصة اختطاف رهائن تقليدية شوفناها في أفلام تانيه.

على صعيد التمثيل نفسه سيلفستر كانت مساحة دوره صغيرة مش كبيرة. وكان معظمها مركز على الأداء الحركي أكتر من الأداء التمثيلي. الأداء الحركي اللي أصلا حسينا أنه ضعيف ومش مقنع زي زمان. بالتالي شعورنا بالفيلم كله كان أقل من توقعاتنا تماما.

Escape Plan: The Extractors من نوعية الأفلام اللي تتفرج عليها أثناء السفر علشان تضيع شوية وقت. لكن لا يستحق مشاهدة بتركيز واهتمام كامل.