Escobar: Paradise Lost اكشن مع لمسة رومانسية

ازي نعرف ان فيلم عجبنا قوي؟ لما نلاقى نفسنا بندور على الانترنت على معلومة الفيلم سابهالنا او قصة حياة شخصية الفيلم تعرض لها.. ده اللى شوفناه مع Escobar، الفيلم اللى بيحكي قصة صعود وهبوط اشهر تاجر مخدرات فى العصر الحديث.. الراجل المسئول عن ادخال اطنان من المخدرات للولايات المتحدة الامريكية بشكل شبه يومي!

الفيلم اللى اخرجه والفه اندريه دي ستيفانو بيبدأ بمشاهد  افتتاحية للبطل جوش هيتشورسن او (نيك) واللى بيتفق مع زعيم تجارة المخدرات فى كولومبيا (اسكوبار) على تخبئة شحنة من المخدرات لصالحه.. ثم بيبدا السيناريو فى اخذنا لرحلة فلاش باك فى حياة (نيك) علشان نعرف ايه اللى وصله للمرحلة اللى هو فيها؟ الامر بيبدأ بعلاقة حب بينه وبين (ماريا) او (كلوديا تريزاك) .. بعد كده بيعرف انها قريبة (اسكوبار) وبتبدأ الأحداث فى السخونة.

اللى حصل فى الحقيقة ان (اسكوبار) اعلن الحرب على الحكومة الكولمبية لما حاولت تقلل من انشطته الاجرامية، ولما دخلت الحكومة الامريكية معاها على الخط –باعتبارها متضررة من افعال اسكوبار- اعلن الاخير الحرب على امريكا وكولومبيا، وبدأ حربه بقتل وزير العدل الكولومبي ومجموعة من رجال الحكومة.. الامر اللى اشعل نار مش هاتنطفى بشكل سهل او سريع.

الفيلم بيستعرض قصة الحب الغير حقيقية وبيمزجها مع الاحداث الحقيقية وبيعرفنا اد ايه كان (اسكوبار) واللى قام بشخصيته فى الفيلم العظيم (بينيكيو ديل تورو) كان اسكوبار متوحش ولا يعرف الرحمة وعلى اتم استعداد لقتل اى شخص يقف فى طريقه، لكن فى لمقابل كان ودود ورحيم باهل كولومبيا، وكان بيبني المستشفيات والكنائس طوال الوقت!

على الرغم من اننا بنشوف فيلم بيقتبس كتير من نمط حياة كولومبيا، الا ن الموسيقي التصويرية لم تكن بالقوة اللى كنا نتوقعها، وكنا نتوقع اغاني اكثر وموسيقي اكثر سخونة وحميمية.. لكن كل اللى كان بيقابلنا كان موسيقي تصويرية نمطية، على العكس من الحوار اللى كان قوي ومؤثر وقدر ينقلنا لجو من التوتر والقلق طوال الوقت، وطبعا الديكورات اللى قدرت تصور لنا الواقع الكولومبي من فقر واحتياج ويمكن ده اللى جعلها تقع فى فخ عصابات المخدرات والتهريب.

Escobar فيلم قوي لو بتحب افلام الاكشن والاثارة مع لمسة من الرومانسية.. وننصحكم تبحثوا فى ويكيبيديا عن (بابلو اسكوبار) رمز الجريمة الاول فى كولومبيا لسنوات.. علشان تقدروا تفهموا بعض احداث الفيلم.