Everest : اسخن الأفلام عن أبرد الأماكن!
ايه النصيحة الأساسية اللى بنوجهها للناس قبل ما يتفرجوا على فيلم (ايفرست)؟ لو بتخافو من المرتفعات ماتدخلوش.. ولو بتتخنقوا من مشاهد الاختناقات ونقص الأكسجين ما تتفرجوش.. لان الفيلم فيه جرعة كبيرة من مشاهد المرتفعات و الاختناقات.
من اخراج بلتازار كورماكور وتاليف سيمون بيوفوي بنشوف قصة مقتبسة عن قصة حقيقية وقعت فى التسعينات، لما حاول بعض الفرق المتخصصة الوصول لقمة جبل ايفرست، اعلى قمة جبل فى العالم، ثم تسببت عاصفة قوية فى وفاة بعضهم.
الفيلم من بطولة جيك جيلنهال فى دور سكوت فيشر و روبت رايت فى دور بيش ويزرث و كيرا نايتلي فى دور جان هال، وغيرهم من الابطال، ويمكن دي ملاحظتنا السلبية الاولى على الفيلم، انه استعان بعدد كبير من الابطال والنجوم لتجسيد عدد كبير من الشخصيات، واللى تحولت مع الوقت لعبء على ذاكرة المشاهد، على الرغم من كون الاحداث الرئيسية بتدور حوالين شخصين او ثلاثة فى النهاية!
السيناريو استهلك النصف الاول من الفيلم فى ربط الشخصيات الرئيسية ببعضها، والاهتمام بخلق تعاطف مشترك بين المشاهد وبين الشخصيات دي، لكن للاسف التعاطف ده لم يستمر فى النصف الثاني من الاحداث بسبب تعقيدات الشخصيات وعددها الكبير، بالتالى حسينا ان السيناريو كان ضعيف وغير مترابط فى النصف الاول من الاحداث واحتفظ بالاثارة كلها للنصف الثاني فقط.
ده بالنسبه للنقاط السلبية.. اما على صعيد الايجابيات، الفيلم قدر بالفعل انه يكتم انفاسنا فى النصف الثاني من الاحداث.. بدايه من مشهد التحرك على السلم الهش بين الجبلين واللى سمعنا خلاله شهقات المتفرجين فى قاعة السينما من صعوبته، ونهاية بمشاهد سقوط بعض الابطال من على قمة الجبل واللى كانت بيتم تصويرها بسهولة واتقان جديد على النوعية دي من الافلام وكانها مجرد حدث عارض فى الفيلم.. ومع سكوت الموسيقي التصويرية تماما فى اللحظات دي المشاهد اكتسبت بعد اكتر قوة من باقى مشاهد الفيلم.
بما اننا اتكلمنا عن الموسيقي التصويرية لازم نقول انها كانت قويه لكن مش ممتازه، او مش بالقوة اللى كنا متصورينها، لكن اللى كان قوي فعلا كان المؤثرات الصوتية الخاصة واللى قدرت تنقل لنا روح جبل افرست وصوت تكتكات البرد اللى شعرنا بيها على الرغم من كوننا فى عز الصيف.. اما التحية الاخيرة فا هاتكون للقائمين على المؤثرات البصرية الخاصة واللى جعلوا مشاهد (قضمات الصقيع) على الاصابع والانف مؤلمة وحاده لدرجة ازعجبتنا احنا شخصيا.
Everest مش افضل فيلم عن البقاء على قيد الحياه فى ظروف صعبه. لكنه فيلم ناجح رغم المط اللى تعرض له السيناريو والعدد الكبير من الشخصيات.
