Every Day: تقدر تحب كل يوم شخص جديد؟!
على الرغم من أننا بنحب الأفلام الرومانسية، ودي حاجة بيشاركنا فيها ناس كتير، إلا أننا زهقنا من تكرار أفكار قصص الأفلام الرومانسية باستمرار، وده الجديد اللي جاء مع فيلم Every Day من خلال مزج الخيال العلمي أو الفانتازيا بالرومانسية. هل نجح الفيلم في هدفه؟
القصة
Every Day بيحكي عن كيان فانتازي بيصحى كل يوم علشان يلاقي نفسه في شخص مختلف. الكيان ده بيقع في حب بنت، الأمر اللي بيخليها كل يوم تقابل شخص مختلف وتقع في حبه بينما هو في النهاية نفس الكيان! هل هاتنجح قصة حب بالشكل الغريب ده؟
فريق العمل
الفيلم من اخراج مايكل سوكزي ومن المعالجة السينمائية ل جيسي أندروز اقتباسا عن رواية ديفيد ليفاثان ومن بطولة جاستيس سميث و أوين تيج و انجويراي رايس و كولين فورد و يعقوب باتالون
الأداء التمثيلي
الأداء التمثيلي لكل الأبطال كان جيد جدا، خاصة انجويراي رايس اللي قدرت تنقل لنا مشاعرها طوال الأحداث وشعورها المتواصل بالدهشة من وقوعها في الحب يوم بعد يوم مع أشخاص مختلفة بيجمعهم أن كلهم بيحركهم نفس الكيان. مش سهل أبدا على الممثل أنه يقدم أداء متجدد ومستمر على مدار الأحداث بالشكل ده لكن رايس نجحت في مهمتها.
السيناريو والحوار والأخراج
سيناريو الفيلم سريع ومش ممل أطلاقا، وتنفيذه على الشاشة كان رائع خاصة مع استغلال المخرج لأمكانيات أبطالة التمثيلية وقدراتهم المختلفة على القيام بأدوارهم بشكل ممتاز ومتناغم علشان يقدم في النهاية فيلم قوي ورومانسي مع نكهة من الفانتازيا في نفس الوقت.
الديكورات والموسيقى والأزياء
ديكورات الفيلم كانت جيدة وقوية واختيار أماكن التصوير كان أفضل، وبشكل عام الفيلم خلق جو وحالة من الحميمية في أحداثه تسربت لنفسية المشاهدين بسهولة وده شيء يحسب لكل العاملين على الفيلم قدرتهم على خلق الحالة دي عند المشاهدين.
الخلاصة
فيلم Every Day فيلم رومانسي خيالي مختلف وجميل وهايعجب أي حد عاوز يخرج بره اطار الأفلام الرومانسية التقليدية.
علشان تبقى عارف:
تقييم الفيلم على موقع IMDB 6 من 10
