Everything, Everything : الحياة في فقاعه

لو قولنا أن فلان الفلاني حابس نفسه وعايش في فقاعه كبيرة. اللي هاييجي في خيال أي شخص بيسمعنا أننا بنتكلم بشكل مجازي. لكن بالنسبة لبطلة فيلم Everything, Everything الكلمة دي كانت حقيقية بشكل فعلي. ازاي ده بيحصل؟ وهل ينفع يحتمل الإنسان حياته في فقاعه أو سجن كبير؟ ده اللي هانشوفه من خلال عرضنا لفيلم Everything, Everything

قصة الفيلم

فيلم Everything, Everything بيحكي عن بنت بتصاب بمرض نادر وليس له علاج، لكن الحل الوحيد لتلافي الموت هو ان البنت لازم تقعد في منزل خاص وما تسيبوش ابدا، لان أي مرة هاتخرج فيها من المنزل ها تتعرض فيها لعدوى قاتلة نتيجة ان جسمها مش قادر يتفاعل مع البيئة الخارجية وجهازها المناعي مش قادر يتصدى لأبسط الامراض الموجودة في البيئة الخارجية

لكن كل حاجه بتتغير لما بتتعرف البنت على جارها الوسيم، وبيبدأ قلبها يدق ويتحرك ناحيته. ازاي العلاقة ممكن تنجح في الظروف الصعبة دي؟!

فريق العمل

الفيلم من اخراج ستيلا ميجي ومن تأليف جى ميلز جودلوى اقتباسا عن رواية نيكولا يوون اللي بتحمل نفس الاسم وحققت مبيعات رائعة أما البطولة فكانت من نصيب آماندلا ستينبرج و نيك روبينسون و أنا دي لا ريجويرا و انيكا نوني روز

 الحوار والسيناريو والإخراج

مستوى حوار الفيلم كان رائع ورومانسي جدا، اما السيناريو وعلى الرغم من شعورنا ببعض البطء في النصف الأول من الأحداث لكن حصل تسارع كبير بعد كده خاصة في الربع الأخير من الاحداث اللي السيناريو فيها كان مميز جدا.

أما إخراج الفيلم فا قدر يجمع كل العناصر دي في سلة واحدة مميزة، وقدر ينتزع احترامنا واهتمامنا.

الموسيقى والديكور

موسيقى الفيلم كانت مميزة ومتماشيه مع الجو الرومانسي والدرامي للأحداث، أما الديكورات وخاصة ديكورات المنزل فكانت أكثر من رائعة، وساعدت ولعبت دور في غاية الأهمية علشان نشعر اننا انتقلنا للجو العام للفيلم واحنا قاعدين في مكاننا!

الخلاصة

دي قصة بنت عايشه في فقاعه اجباريه علشان عندها مرض نادر. ياتري ايه مانع بعضنا من اللي معيشين نفسهم في فقاعة من اختراعهم من انهم يخرجوا ويتفاعلوا مع العالم والحياه والصحاب والحب؟! نعتقد أن كل واحد المفروض يسأل نفسه السؤال ده.

علشان تبقى عارف:

تقييم الفيلم على موقع IMDB 6.4 من 10