Expend4bles : المرتزقة راجعين بجزء جديد
لو عاوزين تعرفوا سلسلة Expendbles ناجحة ولا لاء. يكفي أننا نقول لكم أن بعد عرض الجزء الأول الشباب كانوا بينسوا اسم الفيلم. فكانوا بيسموه (الفيلم اللي فيه كل الابطال القديمة ده). ودلوقت أصبح اسم Expendbles معادل لفيلم أكشن تقليدي محترم يعجب كل محبي النوعية دي من الأفلام. لكن هل الجزء الرابع اللي صدر بعنوان Expend4bles يعتبر امتداد لنجاح باقي السلسلة؟
فيلم Expend4bles بيحكي عن مهمة جديدة لفريق المرتزقة، المرة دي بيُطلب منهم إيقاف عملية استحواذ على أسلحة نووية في ليبيا. لكن المهمة بتفشل وبيتعرض الفريق لخسارة فادحة، مش عاوزين نحرقها عليكم. لكنهم بيقرروا الانتقام واستكمال المهمة في مرحلة لاحقة. ومن هنا بتبدأ الأحداث الحقيقية.
فيلم Expend4bles بيحافظ على نفس مستوى الاكشن في الأجزاء السابقة، وبيلعب على نفس التنويعات السابقة، زي مشاهد الاشتباك بالسلاح الأبيض والناري، ومطاردات السيارات والموتسيكلات والطائرات. والحقيقة أن مستوى الابهار كان نفس مستوى ابهار الأجزاء السابقة.
لكن اللي ماعجبناش هو سوء استخدام الخدع السينمائية، أو بمعنى أصح (الاسترخاص) فيها، بحيث كنا حاسين بالمشاهد اللي تم استعمال خدع الكروما فيها بشكل واضح، وكان باين قوي أن الممثلين أدوا المشاهد دي على خلفية مزيفة وتم تركيب خلفية تانيه في المونتاج. نفس الكلام ينطبق على استخدام الدوبلير في المشاهد القتالية ودي برضو كانت حاجه واضحه.
الحاجه التانيه اللي ماعجبتناش هي أن سلفستر ستالون تقريبا مش موجود في الفيلم، واحنا فاهمين كويس حجة غيابه اللي تم توظيفها بشكل جيد في السيناريو، لكن كان من الخداع وضع صورته في مقدمة الأفيش. واستخدام ظهوره في تريلر الفيلم.
هل معنى كده أن Expend4bles فيلم فاشل؟ الإجابة القصيرة هي لا.. محبي أفلام الأكشن وعشاق سلسلة Expendbles هايشوفوا الفيلم جيد. لكن اللي هايتفرج عليه ومتوقع أنه يتفرج على عظمة ما اتشافش قبلها ولا بعدها. ننصحه يعيد التفكير.
