Fantastic Four : محاولة فاشلة من مارفل
للأسف احنا لازم نعترف: احنا مش من عشاق الافلام المأخوذة عن شخصيات الكوميكس واللى تخصصت مارفل فى تقديمها فى السنوات الأخيرة، يمكن لأننا زهقنا من عملية (القولبة) اللى بتتعرض لها الافلام دي وتحويلها من افلام قائمة على الاكشن والكوميديا لقوالب ثابتة نقدر نختصرها فى عدة مراحل هى:
مرحلة ما قبل الظاهرة الخارقة- مرحلة اكتساب الظاهرة الخارقة- مرحلة استخدام الظاهرة الخارقة- المعركة الفاصلة- نهاية الفيلم!
لو فكرتوا فى كل الافلام اللى قدمتها مارفل عن الابطال الخارقين هاتلاقوها انها بتمر بنفس المراحل، ويمكن حبنا لسلسلة افلام زي بات مان جاء بعد اعادة تقديم الشخصيات الاساسية فى الفيلم بشكل اكثر جدية واكثر فلسفية وبعيداً عن القوالب الجاهزة اللى بتقدمها مارفل فى المعتاد.
نرجع للفيلم.. الفيلم من اخراج جوش ترانك وتأليف سايمون كينبيرج ومن بطولة مايلز تيلر وكيت مارا و مايكل جوردون وجيمي بيل، بنشوف قصة تحول اربع شباب من مجرد شباب عادية لشباب لهم قدرات خاصة وخارقة. عملية التحول بتحصل لهم نتيجة تعرضهم لمادة كونية غريبة وجدوها على كوكب تاني اثناء قيامهم برحلة استكشاف.
مشكلة الفيلم الأساسية هو انه بيحاول يمهد لمجيء جزء جديد وثاني لنفس السلسلة، الامر اللى جعل القائمين عليه يركزوا على عملية التحول اللى بتحصل لأبطال الفيلم وتداعياتها، بشكل التهم نصف الفيلم الأول وربع النصف الثاني من الفيلم، وتركنا مع مشاهد اكشن محدودة وفقيرة فى النهاية ولم تروي عطش محبى النوعية دي من الأفلام.
نفس المشكلة قابلتنا فى الجزء الأخير من سلسلة افلام The Hunger Games واللى كان بيمهد للجزء الثاني واللى هايحصل فيه الصراع الرئيسي، وبكده نقدر نكون فكرة على الاتجاه الانتاجي اللى بتسعي له هوليود بشكل عام وكبار منتجيها بشكل خاص، وهو تقسيم افلامهم على اجزاء بعضها طويل وممل وبعضها قوي وملحمي علشان يعملوا ارباح اكبر وايرادات اعلى، الامر اللى هاينقلب فى النهاية عليهم من خلال زيادة معدلات تحميل الافلام على الانترنت وانخفاض المردود الفلسفي والثقافى للافلام على حساب الارباح واسعار التذاكر.
نرجع للفيلم.. الاداء التمثيلي للابطال الشباب كان ضعيف وغير متزن، والبعد النفسى للشخصيات لم يكن بالوضوح اللى كنا نتوقعه، والفيلم بشكل عام كان اضعف بكتير من توقعاتنا واكتشفنا مع متابعتنا لهاش تاج #FantasticFour على تويتر اننا مش لوحدنا اللى عندنا نفس الانطباع وان تقريباً مشاهدين من كل مكان فى العالم كان عندهم نفس الاحساس.
بنرجح فيلم Fantastic Four للمشاهدة المنزلية من خلال الفضائيات، وانتظار الجزء القادم واللى المفروض يكون اكثر قوة واثارة بعد استهلاك فيلم كامل كنوع من انواع التشويق للجزء القادم!
