Fantasy Island : يارب مايعملوش له جزء تاني!
في أحيان كتيره تعامل صناع الأفلام مع افلامهم بيكون زي تعامل البشر مع الفرص في الحياة. في أحيان كتير بيكون قدامنا فرص رائعة لكن إهمالنا لها بيضيعها. وده اللي حصل مع فيلم Fantasy Island اللي تحول من فرصة واعدة جدا لفيلم فاشل باقتدار!
Fantasy Island بيحكي عن جزيرة خيالية بتحقق أحلام المجمودين فيها. لكن الأحداث بتتطور بشكل درامي بحيث بيحاول اللي على الجزيرة دي النجاة بحياتهم بأي تمن. هل هايقدروا يخرجوا منها؟
قصة الفيلم مأخوذة عن مسلسل ناجح أتعرض سنة ١٩٧٧ يعني صناع الفيلم عندهم فرصة رائعة أنهم يعملوا فيلم جامد بدون مجهود يُذكر.. هل يستغلوا الفرصة دي؟
للأسف Fantasy Island ضيع أي فرصة لصناعة فيلم جيد. والفرص دي ضاعت بسبب الأنتاج القليل جدا واللي كان ظاهر لنا في كل كادر قدر كبير من الاستسهال والاسترخاص الإنتاجي.
مش بس كده.. طريقة كتابة الشخصيات وتقديمها على الشاشة كانت باهته جدا.. ومستهلكة الى أقصى حد ومافيهاش أي محاولة للتجديد أو تقديم شخصية خارج الأطار المحفوظ اللي كلنا متوقعينه لأي فيلم رعب.
وأخيرا.. حوارات الفيلم كانت طويلة جدا وضعيفة جدا وبرضو مافيهاش أي محاولة للتجديد. وفي رأينا لو اجتمع شويه شباب مصري من عشاق أفلام الرعب ممكن يكتبوا سيناريو وحوار أفضل ألف مرة من Fantasy Island
باختصار.. Fantasy Island يصلح للمشاهدة التليفزيونية التقليدية. ولا يستحق المشاهدة في السينما
