Father Stu : لسه فيه أمل حياتك تبقى أحسن

كام مرة حسيت ان الدنيا قفلت في وشك؟ كام مرة حسيتي ان كل حاجه ماشيه غلط، وأن الدنيا دي عبارة عن غابة القوي فيها بياكل الضعيف بدون أي اعتبارات لأي حاجه تانيه؟ لو الشعور ده متملك منك، تبقى محتاج جرعة تفاؤل بإن كل حاجه ممكن تبقى أحسن. وأن باب التوبة والتغير للأحسن لسه مفتوح للجميع. ودي رسالة فيلم Father Stu

Father Stu بيحكي عن القصة الحقيقية لستيوارت لونج، لاعب ملاكمة سابق، وشخص مش بيحركه غير شهواته، وغضبه على المجتمع، وشعوره أن كل حاجه في الدنيا لازم تتاخد بالقوة. وأنه فات زمن اقناع الناس بالحسنى، وأن المجتمع ماهو الا مستنقع كبير من كل حاجه شريرة في الدنيا!

وفي أحد الأيام – وبدون حرق أحداث- بيحصل له موقف بيغير حياته بالكامل، وبيحوله من قمة البعد عن طريق ربنا، وعن الخير بشكل عام، لشخص مسالم، بل وشخص عاوز يكون أب في الكنيسة. وده طبعا بيحول الأحداث تحول درامي كبير مش عاوزين نحرقه عليكم.

أحلى مافي Father Stu كان الأداء التمثيلي من مارك ويلبرج. واللي ابتعد عن أفلام الأكشن الصرف اللي قدمها مؤخراً، وكأنه بيقول لنا : انا ممثل جامد ومش حاصر نفسي في أدوار معينة. وفعلا رهانه كان في محله.

الفيلم كمان بيقدم لنا عودة قوية لميل جبسون، اللي قدم دور حجمه صغير نسبيا على الشاشة، لكن تأثيره علينا كمشاهدين كان أكتر من رائع. على الرغم من الحوار في الفيلم كان مباشر زياده عن اللازم، ومليان جمل وتعبيرات مش بتُستخدم في الحياة العادية للبشر. وكان نفسنا الحوار يكون أبسط من كده شوية، أو يسيب جزء من التخيل للمشاهد بدل تسطيح الأمور بالشكل اللي ظهر بيه.

Father Stu فيلم بيعرفنا قيمة الحياة، وأن دوام الحال من المحال، وبالتالي غلط نحكم على الناس ونصنفهم في خانات معينة علشان نريح دماغنا. بينما كل يوم بيعدي علينا هو فرصة جديدة لبداية الحياة بشكل مختلف.