February : رعب فاشل وتشويق منعدم!
المثل بيقول: اللى بيزيد عن حده بيتقلب لضده… ومحاولة صناع فيلم February لخلق حالة من التشويق والرعب فى الأحداث بائت بالفشل الذريع… ويشهد على كده حالة الغضب اللى انتابت المشاهدين اللى كانوا معانا فى قاعة السينما.
الفيلم بيعرض تحت إسم تاني هو The Blackcoat’s Daughter وهو من تأليف وإخراج أوسجود بيركنز وبطولة إيما روبرتس – بنت أخو جوليا روبرتس- و كيرنان شيبكا و دوغلاس كيد.
الفيلم بيحكي عن قصة بنتين بيتعرضوا لسلسلة من المواقف المرعبة فى فصل الشتاء فى أحد المدارس الداخلية… الفيلم بيركز فى المقام الأول على الرعب النفسي ثم بيبدأ فى تقديم جرعة ضئيلة من الرعب القائم على (الخض) والمفجأت… وللأسف فشل صناع الفيلم فى خلق أي حالة من الرعب سواء النفسى أو الظاهر على الشاشة.
الأداء التمثيلي للأبطال كان ضعيف جدا.. كمان السيناريو الممل اللى حاول القائمين عليه إنهم يخلوه ملىء بالغموض والإثارة تضافر مع ضعف التمثيل علشان يقدموا لنا حوالى ساعتين من الملل الشديد وعدم التجديد فى القصة أو السيناريو أو الحوار.
يمكن المؤثرات الصوتية والإضاءة كان لهم بعض الفضل فى عدم إنزعاجنا من الفيلم بشكل كامل من الفيلم، لكن مهما كانت المؤثرات والموسيقي والديكور قوية.. يعملوا إيه لما يبقى القصة والسيناريو بيحاولوا يخوفونا طوال الوقت بدون ما ينجحوا فى الفكرة دي؟!
February أو The Blackcoat’s Daughter محاولة يائسة لتقديم فيلم رعب وغموض وإثارة تحولت لفيلم ممل وغير مُبشر على الإطلاق.
