First Man: خطوة بسيطة لإنسان.. خطوة مذهلة للإنسانية!
“خطوة بسيطة لإنسان. لكنها خطوة مذهلة للإنسانية!”
هو ده الوصف اللي تم إطلاقه على لحظة صعود أول رجل للقمر. اللحظة اللي تم توثيقها في بث حي تناقلته وكالات الأنباء في يوليو 1966. فيلم First Man بيتناول قصة أول رجل وضع أقدامه على القمر. نيل أرمسترونج.
على الرغم من أشتياقنا كمشاهدين لمعرفة كواليس رحلة الصعود للقمر. وايه اللي حصل فيها. لكن جيمس آر هانسن مؤلف الكتاب اللي تم اقتباس الفيلم عنه قرر أنه يتناول الأحداث من وجهة نظر أكثر إنسانية. بحيث أنه يقدم لنا الإنسان اللي وراء رحلة الصعود الى القمر. وده كان نفس الإتجاه اللي سار فيه دامين شازيل مخرج الفيلم.
وعلشان الفيلم مركز قوي على الحالة الإنسانية. كان لازم البطل يكون ريان جوسلينج. ريان من الفنانين اللي قدروا يقدموا نفسهم بقوة في مساحة الأعمال الرومانسية والعاطفية. زي La La Land و The Notebook وغيرها من الأعمال. والحقيقة أنه قدر يقوم بالدور كويس جدا على الرغم من التعقيدات والشخصية المركبة اللي قدر يأديها بشكل جيد.
من ناحية تانيه بتشارك جوسلينج البطولة الممثلة المميزة كلير فوي. والحقيقة أن كلير مركزة الفترة دي مع أفلام الغموض والأكشن. واللي بيأكد كلامنا مشاركتها في بطولة فيلم The Girl in the Spider’s Web واللي يعتبر الجزء الثاني من الفيلم الناجح the girl with dragon tattoo والجزء الثاني هايعرض في نوفمبر المقبل. لكن ليه كلير تقوم ببطولة فيلم تاريخي إنساني زي First Man؟!
من الواضح إنها بتجرب نفسها في شخصيات مختلفة وبتحاول كل فترة تخرج عن جلدها ونوعية الأدوار اللي بيتم حصرها فيها علشان تؤكد للمنتجين – ولينا – إنها مش مجرد وجه جميل. لكن موهبة تمثيلية محترمة.
أما عن إخراج الفيلم. فمن الأمور اللي عجبتنا الأهتمام بالتفاصيل العلمية لعملية الصعود خارج الغلاف الجوي. كمان عجبنا المزج بين سرد التاريخ زي ما حصل وبين الغوص في أعماق الأحداث الإنسانية اللي بتدور في كواليس الناحية التاريخية.
فيلم First Man مش بس هايعجب محبي التاريخ. كمان هايعجب محبي أفلام الفضاء والمغامرات العلمية الفريدة من نوعها
علشان تبقى عارف: بدأ تصوير الفيلم في أكتوبر 2017 وتكلف حوالي 70 مليون دولار كميزانية.
