Fits Fight : كوميديا بلا نهاية في المدارس

مرحلة الدراسة الثانوية بكل ما يصحبها من مشاكل وصداقات ومواقف كوميدية، أصبحت مادة خصبة لتقديم كتير من أفلام هوليود، ومن الواضح أن النوعية دي من الأفلام بتكون مضمونة النجاح، بسبب الشريحة العمرية اللي بتعتبر الشريحة الأكثر دخولاً للسينما في العالم وفي الولايات المتحدة الأمريكية.

فيلم Fits Fight من تأليف ماكس جرينفيلد ومن سيناريو وحوار ايفان سوسير، ومن إخراج ريتشي كين وبطولة تشارلي داي وأيس كيوب و دين نوريس و كريستينا هندريكس.

الفيلم بيحكي عن اليوم الدراسي الأخير في أحد المدارس الثانوية، والمتعارف عليه من الحيل والخدع اللي بيعملها الطلاب في المدرسين والمديرين في اليوم ده، لكن الأمور بتخرج عن السيطرة مع أحد المدرسين (أيس كيوب) وبيعتدي بعنف على أحد الطلبة، ونتيجة شهادة المدرس زميله (تشارلي داي) بيخسر كيوب وظيفته، الأمر اللي بيخليه يتوعد زميله بالضرب بعد نهاية اليوم الدراسي.

مع أنتشار مواقع التواصل الاجتماعي بين الطلبة بيتم تناقل الخبر، ومجرد المقارنة الجسدية بين أيس  كيوب وزميله بنعرف أن المنافسة محسومة من البداية.. لكن تشارلي داي بيحاول يقوم بكل المجهودات الازمة علشان يهرب من المواجهة المحتومة.

من المشاهد المميزة في الفيلم مشهد المقابلة في غرفة الاجتماعات، والإسقاط السياسي الكبير اللي تمثل في جلوس أحد الأبطال في مقعد إسرائيل، والثاني في مقعد إيران، وحسينا ساعتها أن كل جملة حوارية مقصودة، وكل إيماءه وطريقة كلام كان الهدف منها توصيل هدف سياسي بحت في وسط الكوميديا.

بالكلام عن الأداء التمثيلي، لازم نشيد بموهبة تشارلي داي، وقدرته المتميزة على تقديم كوميديا رائعة بتخلينا مش قادرين نمسك نفسنا من فرط الضحك.. داي قدم قبل كده أدوار متميزة في أفلام زي سلسلة أفلام Horrible Bosses و Vacation وغيرها من الأفلام.. وبيساعده بنيانه الجسدي المضحك وطريقته في الكلام ونبرة صوته علشان يقدم مواقف كوميدية متميزة.

أيس كيوب وعلى الرغم من بنيانه اللي مالوش علاقة بالكوميديا ويصلح أكتر لأغاني الراب أو أفلام الأكشن، إلا أنه كمان قدر يقدم أداء كوميدي متميز، لكن بنعيب على سيناريو الفيلم نفسه أنه مكانش فيه مساحات كوميدية واسعة يقدر النجوم فيها يقدموا أفضل ما عندهم.. تصميم المواقف الكوميدية نفسه كان محتاج مراجعة وشغل أكتر من كده.

الموسيقي التصويرية والديكورات لعبوا دور مهم في الأحداث، خاصة ديكور المدرسة الثانوية اللى بتدور فيه معظم الأحداث، واللي قدر ينقل لنا مواقف الفيلم الكوميدية بصدق وقوة، لكن الموسيقي التصويرية كان نفسنا تكون على نفس مستوي الديكورات، وعلى الرغم من قوتها لكنها كانت محتاجة تكون أقوي وأكتر حماسة، خاصة أن الفيلم بيستهدف فئة المشاهدين المراهقين والمتحمسين.

Fits Fight فيلم نهاية أسبوع جيد، بيقدم جرعة متوازنة من الكوميديا. كان نفسنا تكون أكتر من كده شويه.

علشان تبقي عارف:

الفيلم يعتبر أول فيلم يخرجه (ريتشي كين).

تقييم الفيلم على موقع IMDB 5.9 من 10 وشارك في التقييم حوالي 2000 مستخدم للموقع