Five Feet Apart : ساعة بقرب الحبيب!
بالنسبة لأي اتنين في قصة حب. بيكون الاقتراب بين بعضهم البعض واحدة من أهم وأجمل الأمنيات اللي بيسعوا لها. لكن بالنسبة لـ(ستيلا) و (ويل) اللي قام بدورهم هايلي لو ريتشاردسون و كول سبروس كان الاقتراب فيه خطر كبير على حياتهم نتيجة اصابتهم بمرض التليف الكيسي اللي بيخلي قابلية الإنسان لالتقاط الأمراض أسرع وأخطر.
تيمة (الحب المستحيل) أو قصة الحب اللي بتمر بظروف استثنائية مش جديدة على السينما عموما ومش جديدة على هوليود بشكل خاص. علشان كده اهتمام المخرج جوستين بالدوني والمؤلف توبياس ياكونيس كان كبير علشان يقدموا سلسلة من المواقف اللي بتجمع الرومانسية بالتراجيديا مع خيط كوميدي خفيف علشان الأحداث تكون أبسط وأخف الى حد ما.
من أحلى الأمور في الفيلم كانت الأداء التمثيلي المتميز من هايلي لو ريتشاردسون واللي قدرت تنقل لنا انفعالاتها بكل تعقيداتها بسهولة وكأنها مش بتمثل. وطبعا كول سبروس هو كمان قدر يقدم أداء قوي بشكل يقدر يعمل دويتو ناجح مع هايلي ويقدم في النهاية أداء فني قوي ومتوازن.
شريط الصوت والموسيقى التصويرية الخاصة بالفيلم كان هو كمان من المميزات الأساسية اللي شوفناها في الفيلم. وقدر يهيأنا نفسيا لكل مرحلة جديدة من مراحل الفيلم بالتزامن معاها.
Five Feet Apart فيلم رومانسي كله مشاعر جياشة. لكن لو كنت من المشاهدين اللي بيتأثروا بسرعة ودموعهم قريبة الفيلم ممكن يأثر فيكم بشكل سلبي. لكن بالنسبة لمحبي الأفلام الرومانسية بشكل عام الفيلم هايكون مميز جدا ويستحق المشاهدة.
