فيلم Flight: عن الإدمان نتحدث
فى بداية مشاهدتنا لفيلم Flight كنا بـ نحسب أن الموضوع الأساسى اللى بـ يركز عليه الفيلم هو حادث تحطم أحد الطائرات اللى بـ يقدر الكابتن المسئول عن الطيارة أنه يخرج من الحادث بأقل قدر ممكن من الخسائر فى الأرواح، لكن اللى اكتشفناه بعد الدقائق الأولى للفيلم أن الفكرة الأصلية بـ تدور عن حياة كابتن الطائرة قبل وبعد الحادث، وتأثير إدمانه على الكحول عليه بعد الحادث. ثم تستمر الأحداث بعد كده بشكل مشوق مش عاوزين نحرقه عليكم لأن الفيلم فعلاً يستحق المشاهدة.
الفيلم اللى أخرجه روبرت زيميكس وقام ببطولته دينزل واشنطن وكيلى ريلى بـ يغوص فى أعماق النفس البشرية، وبـ يخلينا نتفرج على قصة كفاح ضد إدمان المخدرات والكحوليات، السرطان اللى بـ ينخر فى المجتمع الأمريكى بشكل خاص والمجتمعات الإنسانية بشكل عام.
المخرج روبرت زيميكس شوفناه قبل كده فى الفيلم العالمى الكلاسيكى (فورست جامب) بطولة توم هانكس، أما دينزل واشنطن بـ نعتبره واحد من أفضل ممثلى جيله، ولسه لحد النهارده بـ نفتكر دوره فى Crimson tide باعتزاز وتقدير، وكنا واثقين أن المزج بين المخرج العبقرى والممثل الموهوب هـ تكون رائعة، وده اللى لقيناه فى Flightبالفعل.
رغم أن الفيلم مهم لكافة الفئات العمرية للتوعية ضد مخاطر الإدمان بشكل عام وإدمان الكحوليات بشكل خاص، إلا أن مشاهد التعاطى وعدم السيطرة على النفس بـ تخلينا نقول لكم أنه غير مفضل أن المراهقين يشوفوا الفيلم ده، بالإضافة للعديد من المشاهد والجمل الحوارية اللى ممكن تثير ضيق المشاهدين المتحفظين دينيًا، بالإضافة لبعض المشاهد اللى لها إيحاءات جنسية (رغم مقص الرقابة) بالتالى لجان المشاهدة الأمريكية أعطت الفيلم تصنيف “R” اللى بـ يعتبر أعلى تصنيف للرقابة على الأفلام فى الولايات المتحدة.
المشاهد داخل الطائرة ومشهد الهبوط الاضطرارى فى الحقل والتحليق بالطائرة بشكل عكسى كان أكثر من رائع، وكان عندنا إحساس أننا موجودين مع الأبطال فى الطائرة، حاولنا ندور على مشاهد كواليس اللقطات دى لكن واضح أنها زى “سر الخلطة”.. ما حدش بـ يطلعها بره أبدًا!
مؤثرات الإضاءة والصوت كانت زى “الكريزة” اللى بـ توضع على نهاية التورتة علشان تزود جمالها، الفيلم كان رحلة جميلة على مدار ما يقرب من ساعتين ونصف من التجول، سواء فى سماء الولايات المتحدة من خلال مشاهد الطيران، أو التجول داخل النفس البشرية اللى كلنا بـ نشترك فى كثير من عواملها مع بعض بغض النظر عن الجنسية والسن.
