Flora and son : موهبتك هي أملك الوحيد!
امتى ممكن تبدأ رحلتك في إعادة تغيير حياتك كلها للأفضل؟ الحقيقة أن المكان المناسب علشان تبدأ فيه الرحلة دي. هو لما توصل للحضيض تماما! وهو ده اللي اكتشفته فلورا، في رحلتها لاعادة اكتشاف نفسها من خلال أحداث فيلم Flora and Son
فيلم Flora and Son بيحكي عن فلورا (قامت بالدور ايف هيوسون) اللي بتربي ابنها الوحيد ماكس، بعد زواج فاشل انتهى بطلاق حتمي.
فلورا بتعيش في الحضيض فعليا. حضيض من الناحية المادية، لأنها مش عارفه تدير حياتها المالية بشكل كويس، وحضيض عاطفي لإنها مش عارفه تدير حياتها النفسية بشكل كويس، وحضيض إنساني لإنها مش عارفه تدير علاقتها بإبنها بشكل كويس. بمعنى أصح، ممكن نقول أن فلورا هي التجسيد الفعلي للفشل في أي وكل شيء في الحياة. لحد ما يغير حياتها جيتار!
ايوا الكلمة دي قريتوها صح. فلورا بيدخل حياتها (جيتار) بتحصل عليه بطريقة ما مش عاوزين نحرقها عليكم. وبتلاقي نفسها عاوزه تتعلم تعزف على الجيتار، ومن هنا بتبدأ في الحصول على درس اونلاين في العزف، ومن هنا بتتغير حياتها هي وابنها تماما لما بيكتشفوا قدرتهم على صناعة أغاني حقيقية وملهمة للجمهور.
شركة أبل اللي تعتبر الجهة المنتجة للفيلم المعروض على منصتها أبل تي في بلاس، مش قادرة تنسى أنها بالأساس شركة تكنولوجية متخصصة في صناعة وتطوير الأجهزة الذكية على اختلاف أنواعها. بالتالي بنشوف رسائل خفية خلال معظم أحداث الفيلم بتورينا ازاي المكالمات بتحصل من خلال فيس تايم. وازاي استخدام أجهزة ابل بيحصل طول الوقت من كل المستخدمين تقريبا.
عاجبنا قوي تمثيل ايف هيوسون في دور البطولة، وايف من الممثلات اللي لمع اسمهم من خلال اختياراتها القوية في الفترة الأخيرة، شوفناها في Bad Sisters و Behind her eyes وفي كل مرة كنا بنحس اننا امام موهبة تستحق اننا نركز معاها ونشوف أعمالها القادمة.
عاجبنا قوي في جون كارني أنه مركز مع تفاصيل الحياة اليومية لأبطال الفيلم، وأنه مهتم بتقديم صورة حقيقية للناس والمجتمع، بعيدا عن الصورة المثالية اللي بنشوفها في أفلام تانيه، وده انعكس على أداء أبطال فيلمه وازاي ظهروا هم كمان في أداء بسيط مباشر غير انفعالي وفي نفس الوقت صادق ويوصل للمشاهد علطول.
مانقدرش نقول ان الفيلم غنائي استعراضي بالأساس، لكن برضو مانقدرش ننكر أهمية استخدام الأغاني والموسيقى داخل Flora and Son. والحقيقة أن الفيلم متطعم فيه مجموعة من الأغاني والاستعراضات الجميلة جدا واللي تم إخراجها بشكل ممتاز وبشكل منسجم تماما مع دراما الفيلم.
احلى مافي Flora and Son أنه بيدينا جرعة أمل وحب للموهبة اللي جوه كل واحد فينا، وبيعرفنا أننا بس لو كان عندنا الايمان الكافي بالموهبة دي هانقدر نغير حياتنا ١٨٠ درجة. مهما كانت ظروفنا الشخصية صعبة.
