Focus : عن النصب والنصابين

الحقيقة ان محرر الافلام فى كايرو360 فلوسه ضاعت (او اتسرقت) قبل بداية الفيلم بوقت قصير، ولما فوجىء ان الفيلم بيحكي عن مجموعة من النصابين المتخصصين فى النشل والسرقة، فقد اى تعاطف مع الابطال، لكن بعيدا عن الموقف ده، نقدر نعتبر الفيلم متوسط الجوده.

من تأليف و اخراج جلين فيكارا بنشوف قصة (ويل سميث)، النصاب والنشال المحترف، واللى بيقود مجموعة من النشالين المتخصصين فى سرقة الناس اثناء الاحداث الرياضية او الاحداث اللى بيتجمع فيها ناس كتير مع بعض، وبعدها بيتم فرز المسروقات والاستفادة منها.

بيتعرف (سميث) على (مارجوت روبي)، هى كمان نشاله لكن مش محترفه، سميث بيتولى مسئولية تدريبها واستخدامها لمساعدته فى العديد من العمليات، لكن الامور بتوصل بينهم لمفترق الطرق فى النهاية، ثم بيرجعوا يتقابلوا تاني.. وتستمر الاحداث.

الحقيقه ان الفيلم لو كان له بطل ثاني اقل شئنا من ويل سميث كان ممكن نشوفه احسن واقوي، لكن مع وجود سميث فى دور البطولة، كنا نتوقع فيلم اقوي واداء تمثيلي احسن من كده بكتير.

الموسيقي التصويرية كانت كويسة، الديكورات كمان كانت متناغمه مع المشاهد اللى تم تصوير بغضها بزوايا واسعة اعطت جمال متميز لبعض المشاهد، لكن لم يتم استعمالها بشكل مكثف، وبشكل عام الفيلم بينتصر للقصة على حساب اى عامل تاني من عوامل نجاح الافلام.

على الرغم من انتماء الفيلم لنوعية افلام الاثارة والتشويق، الا ان كان عندنا استنتاج لمعظم الاحداث قبل حدوثها، ولم نشعر باي انبهار او مفجات فى الاحداث، وده طبعا شىء يقلل من جودة الفيلم فيما يتعلق بالورق والسيناريو.

وبشكل عام ومع نهاية الفيلم اللى بيناقش عالم النصب وكواليس حياة النشالين، نتمني لكم حياة خالية من السرقة او التعرض للنصب