Frozen II : السحر الحقيقي في الرحلة مش في الهدف!

من الجمل المشهورة في التراث الأنساني أن الكنز الحقيقي في حياة الإنسان هي الخبرات والتجارب اللي بيحصل عليها اثناء سعيه للوصول لهدف ما. وهوده المغزى الأساسي من فيلم Frozen II

Frozen II من الأفلام القليلة اللي الجزء الثاني منها مايقلش جمال عن الجزء الأول من الأحداث. لاحظنا كمان أن مستوى التقدم في الإخراج التقني للاحداث كان اعلى وأفضل. ومن الواضح أن المخرجين كريس باك و جينيفر لي كان اهتمامهم الأساسي انهم يقدموا صورة مبهرة وألوان جميلة وخلابة.

Frozen II بيحكي عن رحلة بطلات الفيلم (آنا) و(إلسا) و(كريستوف) و(أولاف) في الغابة لاستكشاف سر قديم عن مملكتهم.. ومع سير الأحداث بنكتشف أن المتعة والمغامرة في الرحلة نفسها مش في السر.

لو ماشوفتش الجزء الأول من السلسة تقدر تتابع الجزء الثاني بسهولة نتيجة مشهد الفلاش باك اللي في بداية الأحداث. بعدها بنبدأ رحلة الجزء الثاني اللي زي ما قولنا تميزت بالرسوميات اللي كلها حياة والألوان الممتعة للكبار والصغار على حد سواء.

لكن من ناحية تانيه مستوى الأغاني في الفيلم كان أقل من مستوى الأغاني في الجزء الأول وحسينا أن الفيلم كان محتاج يهتم بالجزئية دي بقدر اهتمامه بالأداء الصوتي المميز جدا من أبطال الفيلم على الرغم من أن المسئولين عن موسيقى الفيلم هم روبيرت لوبيز وكريستن آندرسون لوبيز وهم من الفائزين بالأوسكار في المجال

الأداء الصوتي للأبطال كريستين بيل و إدينا منتزل و ستيرلنج كي. براون كان اكثر من رائع وحسسنا اننا امام شخصيات حقيقية من لحم ودم مش مجرد شخصيات كارتونية.

Frozen II فيلم جميل هاتزيد متعة مشاهدته لو كنت متابع السلسلة من الجزء الأول. وصالح للمشاهدة العائلية أو مشاهدة الأطفال لوحدهم بدون أي مشاكل.