Ghost Stories : قصة تقليدية مع تناول مختلف
على الرغم من أهمية القصة في صناعة اي فيلم قوي، إلا أن طريقة تناول القصة إخراجيا عامل مهم بيتوقف عليه في النهاية نجاح الفيلم من عدمه. وهو ده اللي حصل مع فيلم الرعب Ghost Stories اللي تم طرحه في السينمات مؤخرا.
الفيلم بيحكي عن باحث في أمور الرعب إسمه فيليب جودمان (قام بالدور أندي نيمان)، واللي بيحاول يجد طوال الوقت تفسير منطقي لكل ظاهرة مرعبة بعيدا عن أنها قصة من قصص ما وراء الطبيعة. لكنه بيصطدم بمجموعة من القصص واللي بيظهر فيها كلها عنصر غريب غير قابل للتفسير المنطقي بأي حال من الأحوال.
على الرغم من أننا شوفنا قصة الشخص المتشكك في أمور الرعب واللي بيتم اثبات خطأ وجهة نظره في مجموعة كبيرة من القصص زي قصة فيلم 1408 مثلا، إلا أن تناول المخرج والمؤلف جيريمي دايسون للقصة كان مختلف. وقدر يقدم لنا أجواء رعب قوية وحقيقية و(مرعبة) حتى بالنسبة للمشاهدين المخضرمين في عالم أفلام الرعب. ونجح في ده تماما على الرغم من تاريخه الأخراجي اللي مافيهوش أعمال كتير.
من أهم الأمور اللي ساعدت دايسون في مهمته هي الأداء التمثيلي المميز. ونخص بالذكر هنا أندي نيمان اللي قدر يقدم دور البطولة بشكل متميز. وطبعا لا يمكن ننسى الاداء التمثيلي القوي لباقي فريق عمل الفيلم زي مارتن فريمان و بول وايتهاوس و الكس لوثر وغيرهم.
المميز والمرعب في الفيلم أنه بيبتعد عن الأجواء المرعبة التقليدية، وبيقدم رعب مع لمسة فلسفية عميقة، الأمر اللي بيخلي جرعة الرعب في الفيلم مميزة ومختلفة، وده شىء مش بنجده في كتير من أفلام الرعب اللي شوفناها مؤخرا.
والحقيقة أننا مش بس بنرشح Ghost Stories لمحبي أفلام الرعب على اختلاف قوتها ودرجة تأثيرها على المشاهدين المخضرمين والمحترفين في النوع ده من الأفلام. لكن كمان المشاهدين اللي عاوزين يشاهدوا فيلم رعب للمرة الأولى أو الثانية في حياتهم ننصحهم بمشاهدة الفيلم اللي هايعتبر (تقديمه) كويسه ليهم لعالم أفلام الرعب.
