Ghostland : فيلم رعب ينتمي للفئة التقليدية
مع الوقت والخبرة أصبح عندنا في كايرو360 تصنيف لأفلام الرعب. التصنيف الاول هو أفلام الرعب التقليدية اللي بتقدم الرعب بصورته التقليدية المعتمدة على خروج أشخاص أو كائنات من أحد كادرات الشاشة علشان تثير رعب ابطال الفيلم اللي مش بيبطلوا صراخ وعويل طوال الأحداث تقريبا. والفئة الثانية هي أفلام الرعب المعتمدة على الرعب النفسي أو الغير تقليدي. ونقصد هنا أفلام زي فيلم 1408 اللي بيحكي عن غرفة فندق مسكونة بتحتجز كاتب رعب شهير وبترفض خروجه منها!
فيلم Ghostland اللي بيتم عرضه تحت اسم أخر هو Incident in a Ghostland بينتمي للفئة الاولى التقليدية، واللي مش بتقدم أكثر من مشاهد الصراخ والخضات المتتالية. النوعية دي من الأفلام حتى لما بتحقق نجاح فيما يتعلق بالعرض في السينمات بسبب جو الرعب الجماعي اللي بتثيره الأفلام دي. الا انها مش بتقدر تعيش في خيال المشاهدين لأبعد من قاعة العرض اللي بتتعرض فيها.
Ghostland بيحكي عن أسرة بتنتقل لمنزل جديد وصل لهم من خلال الميراث. لكن في الليلة الأولى لهم في المنزل بيتعرضوا لحادث أليم وبشع واستثنائي. الأمر اللي بيترك بصمته على كل اللي حضر الليلة المشئومة. وبيأثر على اختياراتهم ووظائفهم للباقي من حياتهم. فهل تقدر البنات دي تتجاوز المحنة بعد حوالي 16 سنة من الحادث؟
بعيدا عن اسلوب الرعب التقليدي في الأحداث، إلا أن سيناريو الفيلم وقصته اللي كتبها وأخرجها باسكال لوجير قدرت تحتفظ لنفسها بحبكة غير متوقعة وجيدة. وقدرت تخادع المشاهدين أكتر من مرة. وفي كل مرة كنا بنتوقع فيها أن الأحداث وصلت لنهايتها بنكتشف فصل جديد من الأحداث قدر يجذبنا. وده شىء يحسب لصناع الفيلم. جدير بالذكر أن باسكال لوجير مخرج الفيلم قدم قبل كده افلام بتندرج تحت نفس التصنيف زي The Tall Man و Martyrs
بالنسبة لافلام الرعب اللي بالشكل ده بيكون صعب اننا نحكم على الأداء التمثيلي للابطال. علشان كده مش قادرين نكون وجهة نظر قوية عن الاداء التمثيلي لكريستال ريد أو ميلين فارمر أو انستازيا فيلبس بطلات الفيلم. لكن في المجمل قدراتهم على عكس مشاهد الرعب والهلع كانت جيدة.
بنرشح Ghostland للمشاهدة في الويك اند قبل نهاية السنة الحالية وفي محاولة استقبال افلام رعب اقوى واكثر فزعا في 2019
