Gran Turismo : نهاية الحد الفاصل بين اللعبة والحقيقة
صناع الألعاب، مخرجين الأفلام، وكل الناس اللي شغالة في صناعة الترفيه بشكل عام، بيكونوا عاوزين يقربوا من الواقع لأقرب درجة ممكنة. علشان يقدموا تجربة ممتعة وحقيقية للناس اللي بيتفرجوا على أعمالهم أو بيلعبوا بيها.
ومن فترة طويلة، ظهرت ألعاب المحاكيات، اللي بتقدم لأصحابها أفضل تجربة تكاد تكون واقعية. علشان يعيشوا حياة مش قادرين يعيشوها في الوقت العادي. بالتالي ظهرت محاكيات للطيران، ومحاكيات لسيارات السباق، وحتى ألعاب زي Fifa وغيرها تعتبر محاكاة للي بيحصل في الأندية الدولية، بما فيها من مباريات مهمة وصفقات استحواذ على لاعبين وما الى ذلك.
فيلم Gran Turismo المقتبس عن قصة حقيقية، بيحكي عن شاب بيظهر براعة غير عادية في اللعب على محاكي قيادة سيارات السباق، وفي نفس الوقت بيتم تنظيم مسابقة، تجمع بين أشطر اللاعبين اونلاين، علشان يتم تدريبهم على قيادة سيارات حقيقية والدخول في سباق حقيقي على أرض الواقع. كنوع من التسويق ومحاولة كسب عملاء جدد.
الفيلم بيورينا ازاي بيتم النظر للفريق القادم من عالم الألعاب بنظرة دونية، لأنهم ماحصلوش على التدريبات المكثفة اللي بيحصل عليها الشخص اللي بينضم لعالم سباق السيارات في سن مبكرة، كمان بنشوف الخوف داخل قلوب اللاعبين من الدخول في مواجهة حقيقية ممكن تقتلهم. بينما أصعب مواجهة بيدخلوها في عالم الألعاب بتنتهي بمجرد الضغط على Reset مثلا.
لكن أحلى مافي Gran Turismo انه بيوجه رسالة للمشاهد نفسه، إنه يكون أكثر ايمانا بنفسه وقدراته. وانك لو جواك موهبة أو مهارة معينة، فا انت محتاج تأمن بيها وتدعمها وتمشي وراها للنهاية، مهما تصورت عند لحظة معينة انها قليلة أو غير كافية. أو انك وصلت لنهاية المسار اللي ممكن توصل له.
سيناريو الفيلم اللي كتبه زاك بالين و ويل دون كان هو مفتاح السر للمخرج نيل بلومكامب اللي قدر يطول على السيناريو المكتوب باحترافية وبيدي المشاهد جرعة حماس، علشان نشوف على الشاشة في النهاية مجموعة من أحلى مشاهد سباق السيارات، واللي جمعت أحيانا بين مشاهد مصنوعة بالخدع السينمائية بالكامل، وبين مشاهد تم تصويرها بشكل حقيقي. وفي الحالتين لو كنتم من محبي مشاهد سباق السيارات فا الفيلم هايكون متعة بصرية أكيدة لكم.
الفنان الشاب آرشي ماديكوي بيقدم أداء ممتاز في دور الشاب الطموح اللي عاوز يشارك في سباق السيارات الواقعي بعد تحقيقه التفوق في عالم الألعاب، وبيشاركه البطولة أورلاندو بلوم اللي قدم هو كمان دور ممتاز، لشخصية مُركبة بتتأرجح طول الوقت بين الرغبة في تحفيز البطل، وفي نفس الوقت كبح جماح غروره وفهمه لنفسه بشكل خاطئ.
فيلم Gran Turismo فيه خيط درامي رومانسي من خلال قصة الحب اللي بتنشأ بين البطل وحبيبته. والحقيقة اننا حسينا أن الخيط ده مقحم على الأحداث، علشان جرى العرف أن أي سيناريو ناجح لازم يكون فيه خيط درامي على كوميدي على تراجيدي. مع الأكشن طبعا. لكن الخيط ده كان ضعيف وماحسيناش أنه يستحق المتابعة.
الخلاصة. فيلم Gran Turismo فيلم ممتاز لمحبي الأفلام اللي بتدور عن حلبة سباق السيارات، والناس اللي عاوزه تتفرج على فيلم فيه جرعة تفاؤل تساعدهم على البحث عن حلمهم والوثوق فيه الى النهاية.
