Guardians Of The Tomb: قصة اكتشاف أثري ملعون

على الرغم من كثرة أفلام الرعب والمغامرة اللي بيتم طرحها في السينمات، إلا أنه من النادر أننا نجد فيلم قوي ومؤثر في الفئة دي.  تعالوا نتعرف أكتر على Guardians Of The Tomb ونشوف هل هايكون فيلم قوي أم مجرد أضافة لعالم أفلام المغامرات والرعب؟

القصة

Guardians Of The Tomb بيحكي عن كشف أثري لامبراطور محفوظ كمومياء، لكن الكشف الأثري اللي كان المفروض كل شيء فيه يمر بشكل اعتيادي وتقليدي بيتحول لمغامرة مرعبة مع اكتشاف الفريق الأثري لسر ملعون كان المفروض يظل طي الكتمان طوال السنين دي.

فريق العمل

الفيلم من تأليف وإخراج  كيمبل ريندال ومن بطولة  كيلسي جرامر و كيلان لوتز و بينجبينج لي و ستيف داوسون و تيم دراكسي و ريان جونسون

الأداء التمثيلي

للأسف الأداء التمثيلي لأبطال الفيلم كان ضعيف وغير مؤثر، وحسينا في كتير من المشاهد أن الأبطال مش عارفين يتكيفوا مع فكرة إضافة المؤثرات الخاصة وضرورة تفاعلهم مع بعض المشاهد كأنها بتحصل أمامهم في الواقع. ودي كانت من أكتر الأمور اللي ضايقتنا في مشاهد الفيلم.

السيناريو والحوار والأخراج

على الرغم من قوة قصة الفيلم، إلا أن تحويلها لسيناريو كان ضعيف، على العكس من الحوار اللي ساعد المشاهدين على فهم الأحداث والتكيف معاها بشكل صحيح ومناسب. وبشكل عام نقدر نلوم الأخراج على ضعف مستوى الفيلم الفني لأنه مكانش قادر يستغل أدواته بشكل صحيح علشان يخرج في النهاية بعمل قوي.

الديكورات والموسيقى والأزياء

ديكورات الفيلم كانت متوسطة هي والموسيقى التصويرية، وقدرت الى حد ما تنقلنا لمكان وزمان أحداث الفيلم. لكن لو كان مستواها أفضل كان ممكن الفيلم يكتب له مستوى أفضل من النجاح

الخلاصة

Guardians Of The Tomb مش أسوأ فيلم مغامرات ورعب شوفناه، لكنه كان يحتاج المزيد من المجهود والاهتمام علشان يخرج بشكل أفضل

علشان تبقى عارف:

تقييم الفيلم على موقع IMDB 5 من 10