Hands Of Stone: فيلم ملاكمة مكرر

مغامرة كبيرة.. هو ده الوصف اللى ممكن نوصف بيه محاولة أي مخرج أو فريق عمل فى أحد الافلام بتقديم فيلم عن الملاكمة… ليه؟ علشان المنطقة دي أصبحت محفوظة من كثرة الافلام الجيدة والمتميزة اللى تم تقديمها عن عالم الملاكمة وبطولات الملاكمين.

لما تفكر –كمخرج أو منتج- فى تقديم قصة صعود ملاكم… مهروسة فى ألف فيلم وفيلم، وسبق وشوفنا سلسلة كاملة من الأفلام بتحكي عن قصة صعود أحد الملاكمين.. لازم فى الحالة دي تقدم لنا شىء ما حصلش قبل كده… سواء من ناحية تقديم قصة جديدة ومختلفة، أو فى تقديم مؤثرات خاصة وشغل جرافيكس متميز يخلينا مشدودين طوال الوقت.. أو حتي من حيث تقديم موسيقي وديكورات مختلفة عن ما سبق.

للأسف ولا حاجه من اللى بنقول عليها دي شوفناها فى Hands Of Stone… حتي إسم الفيلم نفسه شبه سلسلة أفلام Rocky من حيث التعبير بإسم الفيلم عن الصلابة والقوة… ولما نتكلم عن فيلم بقصة تقليدية عن أجواء تقليدية بموسيقي وديكور تقليدي… لكم أن تتخيلوا حجم الملل اللى شعرنا به أثناء مشاهدة الفيلم.

Hands Of Stone من إخراج وتأليف جوناثان جاكوبوكيز وبطولة روبرت دي نيرو و ادجار راميريز وبيحكي عن قصة الملاكم روبرتو دوران ومدربة المحترف، وقصة صعوده فى عالم التألق الرياضى فى لعبة الملاكمة وكل التعقيدات اللى بتصاحب قصة الصعود دي.

طبعا الأداء التمثيلي لروبرت دي نيرو كان أكتر من رائع، لكن بشكل عام نقدر نقول إن كل الأداءات التمثيلية فى الفيلم كانت مكررة وحسينا إنها مقتبسة من سلسلة أفلام روكي أو حتي فيلم Million Dollar baby وغيرها من أفلام الملاكمة الشهيرة.

نفس الكلام نقدر نقوله عن الديكورات والموسيقي التصويرية وحركة الكاميرا وباقى عناصر الفيلم… وبما إننا مش بنحب التكرار –على العكس من صناع الفيلم- هانكتفى إننا نقول إن الفيلم ماقدمش أي جديد فى كل العناصر اللى بنتكلم عنها دي.

لكن مش معني إن الفيلم ماقدمش جديد إن الفيلم نفسه سىء… لكن لو قارناه بباقى أفلام الملاكمة النتيجة هاتكون مش فى صالح Hands Of Stone للأسف الشديد.

أخر كلامنا عن الفيلم… لو أول مره تتفرج على فيلم عن الملاكمة Hands Of Stone هايعجبك جدا وهاتحس إنه أفضل فيلم عن الملاكمة.. أما لو كنت زينا من محبي الأفلام اللى بتتكلم عن الرياضات العنيفة.. أي فيلم تاني عن الملاكمة هايكون أفضل بمراحل عن Hands Of Stone.