Happy Death Day 2U : الموته اللي فاتت كانت أحلى بكتير!
شوفنا أفلام كتير بتتناول تيمة اليوم اللي بيتعاد باستمرار. يعني البطل يصحى من النوم وتحصل له مجموعة من الأحداث ثم يموت في نهاية اليوم ويصحى تتكرر نفس الأحداث.. وهكذا. وده اللي أعتمد عليه الجزء الأول من السلسلة واللي كان باسم Happy Death Day وعرض في 2017
وشوفنا في الجزء الأول فتاة شابة بتعيش تفاصيل حياتها اليومية وبتتعرض في نهاية اليوم للقتل وبيتم إعادة تفاصيل يومها الأخير مرة بعد مرة. لكن في الجزء الثاني بنشوفها بعد قدرتها على الخروج من دائرة التكرار. لكن المرة دي بيقع فيها واحد من أصدقائها (كارتر) – وقام بالدور إسرائيل بروسارد-
على الرغم من تكرار القصة والحبكة لكن المخرج والمؤلف كريستوفر لندن بذل قصارى جهده علشان يخرج الفيلم قوي قدر الإمكان. والطريق اللي أخده علشان يوصل لده هو الخلط بين الكوميديا والأكشن والرعب. والخليط النهائي كان مميز.
لكن على الرغم من محاولة تغيير طريقة التناول. لكن التيمة العامة للفيلم مستهلكة جدا وشوفناها في أعمال أكتر من اللازم. ومن هنا ممكن يحس المشاهدين بالملل خاصة المشاهدين اللي لهم خبرة طويلة في عالم الأفلام. وللأسف ماقدرش الفيلم يتفوق على النجاح اللي حققه الجزء الأول
جيسيكا روث في دور تري جيلبمان قدرت تقدم أداء تمثيلي جيد. صحيح أنها كانت منفعلة أكثر من اللازم في بعض المشاهد لكن أدائها العام قوي ومميز وشجعنا على مشاهدة الفيلم للنهاية. والحقيقة أن النوعية دي من الأفلام بتعتمد بشكل كبير على ممثل واحد هو اللي بيقوم بدور البطولة. لكن المرة دي بنشوف محاولة لتسليط الضوء على باقي الأبطال زي إسرائيل بروسارد و راتشيل ماثيوز و في فو وغيرهم من الأبطال.
Happy Death Day 2U فيلم ذكي بيحاول يقدم حبكة وقصة مستهلكة بطريقة جديدة. مانجحش في هدفه بنسبة 100% لكن برضو قدم لنا فيلم جيد ويستحق المشاهدة لمحبي حبكة اليوم المتكرر.
