He Named Me Malala : الكفاح من اجل الحرية
بقى لنا فترة طويلة ما شوفناش فيلم وثائقي بالجمال ده.. او التركيز ده.. او القدرة دي على حكي قصة ملخصة وبسيطة من خلال مجموعة من المشاهد المترابطة والحوار اللى بيوضح كل شىء.. وثائقي متعوب عليه ويستحق المشاهدة والتقييم من كل محبي الوثائقيات.
الفيلم اللى اخرجه ديفيس جوجنهايم بيحكي عن البنت الباكستانية الصغيرة (مالالا يوسفازي) واللى بتصر على الذهاب للمدرسة على الرغم من قيام حركة طالبان بالسيطرة على مقاليد الأمور ومحاولتهم منع تعلييم البنات.
فى سبيل منعها من ايصال صوتها، حاولت حركة طالبان اغتيالها.. اعترض طريقها شخص مسلح واطلق الرصاص على راسها مباشرة.. لكن الطلقة لم تقتلها.. على الرغم من تسببها لها فى مشاكل صحية كثيرة وعدم قدرتها الكاملة على تحريك نصفها الأيمن الا بشكل بسيط، الا ان مالالا صممت انها تكمل كفاحها وتستمر فى رحلة تعليمها بمساعدة والدها الشجاع.
الفيلم بيستعرض ازاي بدأت مالالا كتابة يومياتها لحساب موقع بى بى سى كيوميات بنت بتسعي للتعليم فى منطقة ملتهبة ممكن يحصل فيها اي كارثه فى اي وقت خاصة مع بداية استهداف طالبان للمدارس وحافلات المدارس اللى بتودي البنات للمدارس علشان يتعلموا، الامر اللى عرض مالالا لهجوم ثاني كان هايقتلها المرة دي.
الفيلم ايضا بيستعرض اهتمام وسائل الاعلام بقصة مالالا والهيئات الدولية اللى بدأت تتعاون معاها وتمنحها الجوائز، لكن اهم جائزة كانت جائزة نوبل طبعا واللى سعت مالالا أنها تحصل عليها، لكن هل ها تحصل فعلا على اهم جائزة فى العالم ممكن تمكنها من تحقيق كتير من الامور لبنات باكستان؟
الفيلم يبيدأ بتصوير حياة (مالالا) بشكل طبيعي وتقليدي، مش بيحاول يظهرها باكثر من كونها طفلة صغيرة بتلعب مع اخوتها وبتحاول تذاكر دروسها، ثم بيبدأ فى التركيز على علاقتها بوالدها، العلاقة اللى ممكن يعتبرها الكثير استغلالا من الأب لقضية بنته، والبعض الاخر ممكن يشوفها شجاعة من الأب فى التعامل مع حركة مسلحة مش بتفهم غير القتل.
على الرغم من شعورنا بالملل فى منتصف الفيلم، الا ان بداية ونهاية الاحداث امتازوا بقوة وقدرة على الجذب، وعلى الرغم من الاطاله فى منطقة منتصف الاحداث الا ان باقى الأحداث كان رتمها اسرع واكثر قدرة على جذبنا واحساسنا بأهمية القضية اللى بتدافع عنها مالالا.
فيلم (مالالا) واحد من اهم واقوي الافلام الوثائقية واللى بيلقي الظل على قضية ناس كتير بتعتبرها من المسلمات فى المجتمعات بتاعتها، علشان كده جه الوقت اللى نكتشف فيه كفاح بنت صغيره فى وجه اصعب واقوي منظمة مسلحة فى المنطقة تقريبا.
