Headshot: أكشن ضعيف وسيناريو هابط

نادراً ما  وجدنا نفسنا مضطرين نعطي فيلم أجنبي تقييم نجمة واحدة من خمس نجوم. لأننا بنعتبر النجمة الواحدة دليل على سقوط وفشل الفيلم بشكل ذريع، لكن ده للأسف اللي شوفناه في فيلم Headshot. وده اللي هانستعرضه معاكم في عرضنا لفيلم Headshot

قصة الفيلم

Headshot بيحكي عن قصة شاب بيظهر على أحد الشواطئ بشكل مفاجئ، وبيكون مصاب إصابة بالغة. وفى المستشفى بيتعرف الشاب على طبيبة جميلة وشاطرة بتحمل على عاتقها مسئولية علاجه من حالة فقدان الذاكرة اللي بيعاني منها.

وفى نفس الوقت اللي بيبدأ (إسماعيل) أو (أشمايل) حسب النطق في الفيلم، بيبدأ يتعافي، في نفس الوقت اللي بتحاول عصابه دموية وغامضة قتله بأي طريقة ممكنة، حتى لو من خلال استهداف حبيبته وطبيبته.

فريق العمل

الفيلم من اخراج تيمو تياهيانتو ومن بطولة أيكو أويس و زاك لي و تشيلسي إيسلان و صاني بانج

السيناريو والحوار والإخراج

إخراج الفيلم كان سقطة كبيرة وغلطة أدت بالفيلم كله لحالة من عدم الاتزان وعدم قدرة الممثلين على القيام بأدوارهم بشكل مقنع. وكان من الواضح أن المخرج فاقد للقدرة على التحكم في الممثلين علشان كده خرج الأداء التمثيلي في النهاية ضعيف ومهلهل.

الحوار في الفيلم مبتور وضعيف وغير مؤثر بالمرة. أما السيناريو وطريقة النقل بين المشاهد المختلفة كان سىء جدا وأضاف على الفيلم ضعف فوق ضعفه.

الموسيقى والديكور والتصوير

على الرغم من أن الفيلم بينتمي لمنطقة أفلام الأكشن والمطاردات، إلا أن إخراج مشاهد الحركة كانت ضعيفه وغير مؤثرة، والسبب الرئيسي فيها كان أسلوب التصوير السيء واللي ركز في المقام الأول على إظهار مشاهد العنف والدم ومشاهد الحركة المبالغ فيها على حساب باقي عناصر الفيلم.

وطبعا لو ده مستوى الفيلم في المجمل فكان لازم ننسى أي تميز للموسيقى التصويرية أو الديكورات، على الرغم من أن الفيلم كان عنده القدرة على عرض كتير من المشاهد الطبيعية سواء في البيئة البحرية أو في بيئة الغابات والأشجار الكثيفة. بس كان لازم الفيلم يفوت على نفسه أي فرصة لتقديم أي شيء جيد.

علشان تبقى عارف:

الفيلم أندونيسي الجنسية