Hell Fest: فيلم رعب مناسب لموسم الهالوين
أجواء الهالوين (عيد الرعب) بتشجع كتير من المنتجين على تقديم أفلام الرعب في الموسم ده تحديدا. وسبب نزول أفلام رعب كتير في الفترة دي هي احتياج المشاهدين لفيلم رعب خفيف يقضوا أمامه السهرة في السينما. بدون تشغيل دماغ كتير أو محاولات لفهم أحداث معقدة. وفيلم Hell Fest ينتمي للفئة دي.
Hell Fest بيحكي عن مهرجان عيد الجحيم اللي بيتوجه له مجموعة من الأصدقاء. لكنهم بيكتشفوا أن هناك قاتل متسلسل بيستغل المهرجان علشان ينفذ مجموعة من جرائم القتل. بينما معظم الحضور متصورين أن اللي بيحصل مجرد جزء من العرض!
مخرج الفيلم جريجوري بولتكين شارك بالتأليف أو الإخراج في أعمال قوية ومؤثرة ومعظمها بيدور في منطقة الرعب زي Get Out أو Happy death day أو Paranormal Activity: The Ghost Dimension وغيرها من الأعمال القوية. بالتالي احنا بنتفرج على فيلم من (صنايعي) متخصص في مجال الرعب وعارف يقدم تيمات اخراجية ومشاهد مرعبة مؤثرة. وده كان واضح من إخراجه للفيلم.
أبطال الفيلم بيكس تايلور-كلاوس اللي قامت بدور تايلور و رين إدواردز اللي قامت بدور بروك و ايمي فورست في دور نتالي. والحقيقة أن كلهم قدروا يقدموا أدوار قوية ومؤثرة. لكن المطلوب منهم طوال الوقت – بما أنه فيلم رعب- كان رسم انطباعات الرعب والهلع طوال الوقت. وبشكل عام أفلام الرعب من بتعتبر اختبار حقيقي لقدرات التمثيل الحقيقية عند أبطال اي فيلم رعب.
على الرغم من أن قصة الفيلم تقليدية ويمكن التنبوء بكل أحداثها تقريبا لكن سيناريو الفيلم السريع ومشاهده المتلاحقة قدرت تقدم لنا تجربة مرعبة وحماسية بدرجة كبيرة. كل ده كان بيشتغل بانسجام مع الموسيقى التصويرية والديكورات اللي تم اختيارها بعناية علشان نشوف في النهاية فيلم رعب جيد وإن كان نمط الرعب فيه اعتمد على تكنيك Jump scare أو القفز من الخوف المرتبط دايما بمشاهد خروج شخصي أو شىء من جانب خفي من الشاشة علشان يرعب بطلة الفيلم – والمشاهدين معاها –
Hell Fest مش أفضل فيلم رعب شوفناه مؤخرا. لكن محبي أفلام الرعب هايشوفوه فيلم مناسب جدا خاصة في فترة الهالوين
