Hellboy : الخدع السينمائية بوظت الفيلم

بيعيد احياء سلسلة أفلام قديمة تم تقديمها من حوالي عشر سنوات أو أكثر عن بطل خارق بيقوم بمغامرات لصالح البشر والبشرية اعتمادا على قدراته الخارقة. وفي الجزء الجديد من الفيلم بنشوف مغامرة جديدة للبطل الخارق اللي بيقوم بدوره (ديفيد هاربور) واللي بيحاول ينقذ البشرية من أذى وشر ساحرة شريرة مصممة على إفناء البشرية بالكامل.

قصة الفيلم والحبكة الأساسية له مش بتقدم جديد. وده مش عيب بالنسبة لفيلم عن بطل خارق بيواجه شرير له قدرات خارقة. وتقريبا كل أفلام الأبطال الخارقين بتدور في نفس الفلك. لكن المشكلة الأساسية للفيلم كانت عرض القصة دي على المشاهدين.

تنفيذ الفيلم كان ضعيف على مستوى الخدع السينمائية اللي زادت تماما عن الحد لدرجة أننا حسينا أننا بنتفرج على فيلم كارتون مش فيلم عادي! كمان الأداء التمثيلي لأبطال الفيلم تأثر بضعف مستوى الخدع وظهر أبطال الفيلم ديفيد هاربر و أيان ماكشين و ميلا جوفوفيتش أقل من مستواهم التمثيلي في أعمال سابقة. وكان الفيلم بالكامل مجرد (سبوبه) مش محاولة إعادة احياء لبطل خارق مميز وله مكانه مميزة عند محبي أفلام الابطال الخارقة.

لكن علشان نكون بنتكلم بموضوعية. مش كل الأداء التمثيلي كان وحش. وكنا بنشوف بعض المشاهد اللي فيها أداء تمثيلي جيد من ديفيد هاربر و ميلا جوفوفيتش. لكن بشكل عام الأداء التمثيلي مكانش الأفضل من الجميع.

لو كنت من محبي السلسلة القديمة لأفلام Hellboy الفيلم الحالي هايحبطكم لأنه مش على نفس مستوى السلسلة القديمة. لكن لو كنت من  محبي أفلام السوبر هيروز وعاوز تشوف فيلم جديد هايعجبكم الفيلم الحالي.