Home : مغامرة عائلية متميزة
يعتبر الفيلم واحد من الافلام القليلة خلال الفترة الاخيرة، اللى ممكن العائلة كلها تستمتع بها، الصغار بسبب الابهار وجودة الرسومات واسلوب عرض الفيلم، وايضا الكبار من خلال الكوميديا الراقية والضحك المعتمد على المواقف والايفيهات الظريفة. ودي تعتبر تجربة مختلفة وجديدة للجميع.
بأخراج تيم جونسون، وبأداء صوتي من ريهانا، جنيفر لوبيز،ستيف مارتن و جيم بارسونز بنشوف قصة كائن فضائى لطيف وظريف وشقى فى نفس الوقت اسمه (اوه)، اكتسب اسمه نتيجة رد فعل كل المحيطين بيه لما يشوفوه!، اوه بيبحث عن موطن أمن يقدر يعيش فيه بأمان، ومش بيلاقى –لسوء حظه- افضل من كوكب الارض علشان يعيش عليه، الامر اللى بيخليه يصطدم ببنت شقية هى الاخري، ومن هنا بتتولد المواقف والمشاهد اللى بتجمع بين الاثارة والاكشن والكوميديا، واللى مش عاوزين نحرقها عليكم.
الفيلم تميز بدعاية اعلانية قوية ومتميزة، من خلال حملة ذكية استهدفت عمل اعلان لتوعية المشاهدين بضرورة عمل تليفوناتهم Silent اثناء الافلام، الامر اللى جعل معظم قاعات العرض السينمائى تعرض الاعلان –اللى بيتضمن اعلان للفيلم كمان- وده كان من اساليب الدعاية الذكية اللى سبق واتبعتها افلام زي The lego movie وغيرها من الاعمال.
التحريك والابهار فى الفيلم كان اكثر من رائع، والحركة على الشاشة كانت انسيابية، وبعض المشاهد كانت مثيرة ومدهشة، لا ننكر اننا شعرنا بالملل فى بعض المشاهد، لكن بشكل عام نقدر نقول ان الفيلم كان متميز من الناحية التقنية او من ناحية السيناريو.
الأداء الصوتي فى الفيلم كان اكتر من متميز، والامر ينطبق على جميع الممثلين المشاركين. ولفت نظرنا حجم الاسماء المشاركة فى الاداء الصوتي للفيلم، وكان نفسنا الممثلين الكبار العرب والمصريين يعملوا زي الاجانب ويشاركوا بالاداء الصوتي لافلام الانيميشن لكن…أه صحيح احنا نسينا ان مصر مش بتنتج افلام انيميشن ضخمه اصلا!
لكن بما اننا بنقارن بين الاجانب وبيننا لازم نقول ان عندنا مشاركات متميزه فى الاداء الصوتي زى الفنان يحيي الفخراني اللى بيقدم اعمال كتير بصوته، وغيرهم من الفنانين الكبار، لكننا نتوقع ونتمني الاقوي والافضل دائما.
فيلم Home فيلم مثالى للمشاهدة الاسرية فى عطلة نهاية الاسبوع. لانه هايكون تجربه متميزة وجديدة للكبار والصغار على حد سواء.
