Home Again: كوميديا رشيقة ورومانسية لطيفة

على صفحات مواقع التواصل الاجتماعي ناس كتير اتهمت Home Again بالتفاهة وعدم وجود مغزى أو هدف قوي وراء قصته. لكن في رأينا الشخصي أننا غلط نحكم على فيلم بدون ما نشوف الفئة العمرية اللي بيتوجه لها والتصنيف اللي بيتبع له. تعالوا نشوف رأينا عن Home Again

القصة

الفيلم بيحكي عن أليس اللي بتجسد دورها ريز ويذرسبون واللي بتنفصل عن زوجها مؤخرا، وبتقرر تحاول تتأقلم مع حياتها الجديدة، لكن حظها بيوقعها في 3 شباب بينتقلوا للحياة معاها –بعد تعقيدات طويلة- فقط علشان تاخد الأحداث منحنيات مختلفة جدا وكوميدية أحيانا ورومانسية أحيانا حتى أننا بنعرف أن الـ… مش عاوزين نحرق عليكم الأحداث أكتر من كده علشان تقدروا تستمعوا بالفيلم.

فريق العمل

الفيلم من تأليف وإخراج  هالى مايرز-شاير وبطولة  ريز ويذرسبون و ليك بيل و مايكل شين و كانديس بيرجن و نات وولف و ريد سكوت.

الأداء التمثيلي

الأداء التمثيلي لكل أبطال الفيلم كان متميز، وخاصة ريز ويذرسبون اللي قدرت تقوم بدورها بشكل ممتاز، وقدرت تنتقل من المشاهد الكوميدية للرومانسية بانسيابية وهدوء ممثلة محترفة وعارفة بالظبط هي بتقدم أيه، وده شيء يحسب لها ويحسب لاخراج الفيلم نفسه.

السيناريو والحوار والأخراج

لازم ندرك أن طبيعة الفيلم موجهة للجمهور المحب للأفلام الرومانسية العاطفية مع لمسة من الكوميديا، يعني لازم لا نتوقع من السيناريو أنه يكون معقد أو فيه أحداث صعبة الفهم. علشان كده استغربنا من بعض الأراء اللي شوفناها على السوشيال ميديا واللي اتهمت الفيلم بالتفاهة، ونحب نقول لهم أن الفرق بين التفاهة ومخاطبة الشريحة الصحيحة من الجمهور شعرة قدر Home Again يتجنبوا الوقوع في الجانب السلبي منها.

الحوار في الفيلم كان عليه عبء سرد الأحداث وتحريكها، وطبعا كان هو المحرك الرئيسي للكوميديا في الفيلم على الرغم من وجود كتير من المواقف الكوميدية في الأحداث لكن الحوار كان هو المسيطر بالأساس.

الديكورات والموسيقى والأزياء

ديكورات الفيلم كانت جيدة وجديدة وواضح فيها الاهتمام بالتفاصيل واحساس الممثلين بالـ(عشره) مع الديكور – وده يعتبر نجاح للاخراج – لكن للأسف الموسيقى التصويرية كانت اضعف من توقعاتنا وكنا نتمنى تكون أفضل من كده

الخلاصة

لو شوفتوا Home Again كفيلم كوميدي رومانسي لطيف ينفع في الويك اند هايعجبكم.

علشان تبقى عارف:

كانت النجمة (روز بيرن) مرشحة لبطولة الفيلم في البداية لكن الدور راح لـ(ريز ويذرسبون) في النهاية.