Hostiles: منافسة جديدة على الأوسكار
منافسة كبيرة كل سنة على جوائز الأوسكار بنشوفها من خلال الحفلة الضخمة اللي بيتم عملها كل سنة لاختيار أفضل أفلام وأفضل ممثلين في عدد كبير من الفئات اللي بتغطي كل أنواع الأفلام والتمثيل.
لكن المنافسة الحقيقية بتبدأ عند تقديم الأفلام في قاعات العرض والتنافس على اعجاب الجمهور والنقاد على حد سواء، الأمر اللي بيخلي فيلم زي منافس قوي ولاعب رئيسي في مسابقة الأوسكار اللي اقتربنا من موعدها. تعالوا نتعرف أكتر على الفيلم.
القصة
Hostiles بيحكي عن الجنرال الجرىء جوزيف جيه بلوكر واللي بيخوض مغامرة لا تتوقف عبر مجموعة من الأراضي اللي فيها مخاطر كبيرة على حياته وحياة كل اللي معاه، لكن المغامرة الأكبر مش بتكون في الاحتفاظ بنفسه على قيد الحياة بقدر ما بتكون في تغير مفاهيمه وقناعاته الشخصية ومشاعره اللي بتختلف مع استمرار الرحلة.
فريق العمل
الفيلم من تأليف وإخراج سكوت كوبر ومن بطولة روزاموند بايك و كريستيان بيل و بن فوستر و ستيفن لانج و جيسي بليمونس
الأداء التمثيلي
الأداء التمثيلي لكل الابطال كان متميز جدا، وأفضل ما في الأداء التمثيلي هو التأني في نضج الشخصيات على الشاشة وتغير قناعاتهم وتفكيرهم مع الوقت، الامر اللي جعل مشاهدتنا للفيلم تصيبنا بحالة من المتعة المستمرة والمضاعفة، ونقدر نقول أن أداء كريستان بيل كان الأفضل على الإطلاق، وهو في الأساس ممثل موهوب وبيقدر يأدي شخصيات مختلفة ومتنوعة.
السيناريو والحوار والأخراج
على الرغم من حالة البطء اللي عانى منها السيناريو في بعض المشاهد وتركيزه على بعض الخيوط اللي بنحس بعد كده انها مش خيوط درامية قوية أو مؤثرة جدا في الأحداث لكن السيناريو قدر يخلق عالم مميز ويدخلنا فيه بكل تفاصيله، وده يدل على الأخراج المتميز والمتأني واللي كان ظاهر بشده مع كل مشهد مرينا بيه.
الديكورات والموسيقى والأزياء
ديكورات الفيلم كانت أكتر من رائعة، واختيار التصوير في مناطق مفتوحة وطبيعية كان من الاختيارات القوية والمؤثرة في الفيلم، كمان الأزياء لعبت دور مهم في الأحداث وقربتنا أكتر وأكتر من الأحداث وجعلت معايشتنا لها أقوى وأفضل، أما الموسيقى التصويرية الهادئة في معظم الأوقات كانت هي كمان قوية وعلى درجة رائعة من القوة.
الخلاصة
فيلم Hostiles فيلم قوي ومناسب جدا للناس اللي بتحب الأفلام اللي ليها أبعاد تاريخية واللي فيها مغامرة وحركة في نفس الوقت
علشان تبقى عارف: تقييم الفيلم على IMDB 7.2 من 10
