Hot Pursuit : كوميديا التناقضات
الافلام الكوميدية المعتمدة على الشخصيات المتناقضة، والقدر اللى بيجمعها وبيجعل من اجتماعها مناسبة لتفجير مواقف مليئة بالكوميديا، نوعية الافلام دي كتير جدا ومنتشرة. لكن السؤال هو : هل قدر Hot pursuit يقدم جديد فى هذه التيمة الكوميدية؟
الاجابة هى : لا.. ويمكن ده اكتر شيء ضايقنا فيما يتعلق بالفيلم، على الرغم من المشاهد اللى ضحكنا عليها لكن طوال الوقت كان عندنا احساس اننا بنشوف فيلم مُعاد، ومقتبس من سلسلة لا تنتهي من الاعمال الكوميدية السابقة.
ظابطة بوليس بتنحدر من عائلة بوليسية باقتدار، والدها ظابط شرطة قديم عودها على احترام القانون وتنفيذه بحذافيره. لكن طريقتها فى تنفيذ القانون بتعنت و (زي الكتاب ما بيقول) بيوقعها فى مشاكل كتير.. بنتكلم عن ريز ويذرسبون او الظابطة كوبر. واللى بتجد نفسها مجبرة على حماية صوفيا فيرجارا او دانيلا ريفا، واللى بتهرب من مجموعة من تجار المخدرات عاوزين يقتلوها لانها هاتشهد ضدهم فى المحكمة.
زى ما احنا عارفين الحبكة السينمائية مش مهمة خالص فى النوعية دي من الافلام المهم هو تمرير اكبر قدر ممكن من المواقف والتعبيرات الكوميدية، لكن فى حالة فيلمنا حسينا ان المخرجة ان فليتشر لم تستغل طاقة ابطالها للحد الاقصي لصنع الكوميديا، لكنها استعاضت عنها بكوميديا سطحية وغير عميقة وما سمعناش صوت الضحك فى القاعة زى ما كنا متوقعين مع بداية عرض التريلر الخاص بالفيلم.
مافيش كلام كتير ممكن نقوله عن الموسيقي التصويرية او الديكور لان زى ما قولنا الافلام دي كل اللى بتهتم بيه هو الكوميديا والسلام ، وهو شىء كويس واحنا مش ضده على فكره لان فكرة تقديم فيلم كوميدي من اجل الكوميديا فقط فكرة كويسة خصوصا فى الايام الصعبة اللى بنشوفها حاليا، لكن حالة الاستسهال اللى شوفناها فى الفيلم هى اللى ضايقتنا.
بنعتقد ان الفيلم غير مناسب للمشاهدة من قبل الاطفال او المشاهدين المتحفظين بشكل عام، للالفاظ والايحاءات والاسترسال فى وصف بعض الامور اللى ممكن تسبب ارتباك عند الاطفال او تحفظات عند المشاهدين الاكثر تحفظا.
اخرنا مع Hot Pursuit هو اننا ننتظره لما يتعرض فى القنوات الفضائية… ونشوفه مع مشروب بارد فى ليله صيف والسلام.
