Hotel Transylvania 3: Summer Vacation : جزء جديد وكوميديا جديدة

سلسلة أفلام Hotel Transylvania تعتبر واحدة من أفضل سلاسل أفلام الأنيميشن اللي شوفناها، لتركيزها على الجانب الكوميدي ولأن أحداثها مناسبة للكبار والصغار على حد سواء. وعلى الرغم من أن السلسلة لم تحقق شهرة كبيرة مقارنة بالأفلام العملاقة اللي بتقدمها ديزني أو بيكسار، لكنها قدرت تحقق انتشار واسع مقارنة بميزانية الفيلم واهتمام عدد كبير من المشاهدين بمتابعة كل جديد عنه.

في الجزء الجديد اللي بيحمل أسم Hotel Transylvania 3: Summer Vacation بنشوف دراكولا لما بيقرر ياخد أجازه طويلة ويحاول يخرج بره عالم الفندق اللي بيقضي فيه باقي الكائنات المرعبة أجازتاهم. وبمجرد بداية الإجازة بيبدأ الجانب الرومانسي داخله في العمل. لكن يا ترى ايه اللي ممكن يحصل مع دراكولا الرومانسي؟

الأداء الصوتي لأدم ساندلر في دور دراكولا و سيلينا جوميز في دور مافيس و كيفن جيمس في دور فرانك بيعرفنا أد ايه بيفرق لما نجوم كبار تقوم بالأداء الصوتي لشخصيات الأنيميشن. لأنهم بيقدروا يقدموا أداء راقي ومميز وقادر على توصيل مشاعرهم بمجرد وضع أصواتهم على شريط الفيلم، ودي مهمة بتكون أصعب من التمثيل بنفسهم على الشاشة على حد وصف كتير من النجوم المحترفين في الأداء الصوتي.

المخرج والمؤلف جيندي تارتاكوفسكي قدر يقدم لنا فيلم متوازن ما بين الكوميديا وما بين المتعة البصرية، وفي النهاية شوفنا فيلم يصلح للكبار والصغار على حد سواء، ودي واحدة من أهم مميزات الفيلم قدرة أي سن على مشاهدته والشعور بالمتعة من خلال المتابعة.

مستوى الرسومات في الفيلم كان عالي جدا ومميز، كمان طريقة تحرك الشخصيات على الشاشة كان سريع وحماسي، واختيار الألوان والموسيقى كان موفق وجميل. وبشكل عام الفيلم كان مريح للعين على مستوى الرؤية وسيناريو الفيلم كان مضحك وخفيف الظل.

Hotel Transylvania 3: Summer Vacation مش أفضل فيلم أنيميشن شوفناه، لكنه جزء مميز من سلسلة قدرت تحصد كتير من الأعجاب والمتابعة.

علشان تبقى عارف: الفيلم يعتبر رقم 18 من أفلام الأنيميشن اللي انتجتها شركة (سوني) في تاريخها.