How to Train Your Dragon: The Hidden World : زيارة جديدة ومختلفة لعالم التنانين!
سلسلة تعتبر واحدة من أشهر وأفضل أفلام الأنيميشن في التاريخ. السبب أن على الرغم من بساطة القصة لكنها قادرة في كل جزء على أبهارنا. والاهتمام بالتفاصيل في السلسلة مميز جدا. وأسباب تانيه هانناقشها معاكم من خلال استعراضنا الجزء الأحدث في السلسلة واللي بيطرح بعنوان How to Train Your Dragon: The Hidden World
الفيلم مقتبس عن سلسلة كتب من تأليف كريسيدا كويل وقصة وسيناريو وحوار دين ديبلوس. والفيلم بيحكي عن محاولة هيكوب (جاي بروتشيل) أنه يعمل يوتوبيا أو مدينة فاضلة للتنانين. لكن في نفس الوقت بتصطدم محاولاته بمجموعة لا تنتهي من المشاكل والمعوقات. هل هايقدر فعلا ينفذ حلمه؟
من أكتر الحاجات اللي لفتت أنتباهنا في الفيلم هي اختيار الشخصيات الرئيسية للأحداث. بنشوف أداء صوتي مميز جدا من كيت بلانشيت في دور فالكا و كريستين ويج في دور روفنوت ثورستون و جيرارد باتلر في دور ستويك ذا فاست و جونا هيل في دور سنوتلوت.. والصراحة أن اختيار الكاست التمثيلي ده عامل زي لقاء السحاب… تخيلوا كده عادل امام ويحيي الفخراني ونور الشريف وأحمد زكي وفاتن حمامه في فيلم واحد!
أما تاني الأمور المميزة في الفيلم. فهي الرسومات المميزة. والتحريك السلس والسريع. والإبهار البصري واستخدام الجرافيكس باحترافية عالية. الحقيقة أن كل مشهد من مشاهد الفيلم قدم لنا متعة غير عادية من ناحية تجربة المشاهدة. علشان كده الفيلم قدر يحقق مستوى رضا عالي سواء بين المشاهدين أو النقاد على حد سواء.
الفيلم كمان جميل من حيث ملائمته للكبار والصغار على حد سواء، ودايما كل جزء من أجزاء How to Train Your Dragonبيحمل هدف ورسالة عاوز يعلمها للمشاهدين. وأحلى ما في الرسالة أنها بتكون مستترة في الأحداث. يعني اللي عاوز يلاحظها هايلاحظها. أما اللي عاوز يتفرج على فيلم خفيف ولطيف ومبهر بصريا وفيه كوميديا لطيفة. برضو هايلاقي اللي عاوزه في الفيلم.
