Human Flow: فيلم عن لعنة اللجوء

على الرغم من أن قضية التهجير القسري أو اللجوء كانت مش من القضايا اللي بتشغل حيز كبير من يومنا في مصر، لكن مؤخرا ومع ظهور كتير من الموضوعات والقضايا السياسية والعسكرية على الساحة أصبحت قضية اللجوء من الحاجات اللي بتشغل بال كتير منا بشكل يومي. ومن هنا بتيجي أهمية فيلم Human Flow

القصة

Human Flow فيلم وثائقي بيحكي عن الناس اللي بتضطر تسيب منازلها وبلادها وتهرب لبلاد ومناطق تانيه، إما لأسباب طبيعية زي المجاعات أو الكوارث الطبيعية والفيضانات، أو بسبب حاجات من صنع الإنسان زي الحروب والصراعات المسلحة.

فريق العمل

الفيلم من تأليف تيم فينش و  شين-شين ياب وأخراج  آي ويوي أما باقي الناس اللي بتظهر في الفيلم فابتظهر بأسمها وشخصيتها الحقيقيين.

من الأمور اللي أعجبتنا في الفيلم قدرته على جذب انتباهنا من خلال سرد الحقائق بشكل تقريري سريع وبدون عرض أي رأي شخصي. بمعنى أخر الفيلم بيضعنا أمام الحقائق المجردة ويسيب لكل مشاهد مهمة استنتاج الحقائق من وراء المعلومات دي، أو حتى تكوين المشاعر والشعور بالحزن أو الغضب من كم الأمور المأساوية اللي البشر بتتسبب بيها لبعضها بالألم والتهجير والموت.

وعلى الرغم من الطبيعة الوثائقية للفيلم لكن الأحداث اللي قدمها الفيلم وطريقة سرده لها خلتنا مهتمين بالمتابعة من البداية للنهاية، بل والتأثر لدرجة أن عيوننا دمعت في بعض مشاهد الفيلم تأثرا بالأحداث والسرد الجذاب، وده من أقوى عوامل الفيلم.

أما من أروع الأمور في الفيلم هي الشمولية، بمعنى أن الفيلم بيصحبنا في رحلة اللجوء من البداية للنهاية، وبيستعرض معانا كم المخاطر اللي بتصاحب الرحلة دي، وده مش بيخلينا مجرد مشاهدين، لكن مشاركين في الحدث نفسه وبنسأل نفسنا كل شويه ايه ممكن يحصل لو –لا قدر الله- كنا مكان الناس دي؟

الخلاصة

لو بتسعى لمعلومات جديدة وجادة ودراسة حقيقية عن أزمة اللجوء في العالم بننصحك بمشاهدة Human Flow

علشان تبقى عارف:

مخرج الفيلم آي ويوي فنان صيني معاصر، شارك مع معماريين من سويسرا في تشييد ملعب بيكين الوطني، ويعتبر ناشط في مجال حقوق الإنسان.