I Feel Pretty: كن جميلا ترى الكون جميلا!
هل نجاح الأنسان في حياته متوقف على نظرته لنفسه، والطريقة اللي بيتعامل بيها مع نفسه قبل ما تكون الطريقة اللي بيتعامل بيها مع الأخرين؟ وهل لو تعاملنا مع نفسنا بطريقة إيجابية ده كفيل بتغيير كل شيء في حياتنا؟ وهل الجمال الحقيقي هو جمال المظهر أم الجوهر؟ كل الأسئلة دي بيجاوب عنها فيلم I Feel Pretty بأسلوب كوميدي وخفيف.. تعالوا نتعرف أكتر على الفيلم.
I Feel Pretty بيحكي عن رينية باريت أو ايمي شومر، واللي بتتعرض لحادث بيأثر على طريقة تفكيرها، وبيخليها تتصور أنها أجمل أنسانة في العالم، الأمر اللي بينعكس على طريقة تعاملها مع كل الأمور حواليها، وخاصة حياتها العملية اللي بتتطور بشكل كبير. لكن هل ده لوحده كافي أنها تحقق النجاح؟ وايه ممكن يحصل لو اكتشفت الحقيقة في لحظة من اللحظات؟
المميز في الفيلم هو مشاركة مجموعة من الفنانين اللي لعبوا أدوارهم ببراعة زي ناعومي كامبل في دور هيلين أو ادريان مارتينيز في دور ماسون أو ميشيل ويليامز في دور افري ليكلير وغيرهم من الفنانين. الجميل في الفيلم كان التوزيع الجيد للأدوار والاهتمام بتوزيع الكوميديا والمواقف الكوميدية على الجميع علشان لا يشعر المشاهد بالملل.
الموسيقى التصويرية واختيار الأغاني الخاصة بالفيلم كان جيد جدا وساعد على شعورنا طوال الوقت بالاندماج في الأحداث والقدرة على التعايش معاها بشكل جيد، كمان اختيار الديكورات وأماكن التصوير ساعد بشكل كبير على شعورنا بكل مشاعر بطلة الفيلم ومعايشتنا للقصة اللي أجاد المخرج مارك سيلفرستاين تقديمها على الشاشة بشكل جيد، قدر من خلاله يوظف تأليف آبي كوهين – اللي شارك في الأخراج أيضا- بشكل جيد.
على الرغم من المفاهيم الفلسفية اللي ممكن تكون معقدة واللي بيناقشها I Feel Pretty الا أن الفيلم نجح في مناقشة أفكاره بشكل كوميدي وخفيف ومناسب للمشاهدين من كافة الأعمار، لكن لازم نحذر من أن الفيلم ممكن يكون غير مناسب للمشاهدين المحافظين نتيجة بعض المشاهد أو الالفاظ اللي بتظهر من خلال الأحداث.
علشان تبقى عارف: ميزانية الفيلم حوالي 32 مليون دولار
