Ice Age: Collision Course : مغامرة جديدة وأخيرة فى العصر الثليحي!
واضح أن سنة 2016 هاتشهد إنتاج أجزاء جديدة –ويمكن أخيرة- من كتير من سلاسل الأفلام الشهيرة.. الحقيقة أن فكرة إنتاج أجزاء جديدة من السلاسل الموجوده فعلاً فكرة مريحة للمنتجين والمؤلفين، وفى نفس الوقت مثيرة للجمهور اللى بيحب يشوف نجومه المفضلين وأفلامه المفضلة وهى بتتقدم له من جديد بطريقة جديدة وميزانية أعلي.. لكن هل Ice Age فى جزئه الخامس ينطبق عليه نفس الكلام؟
من إخراج مايك ثورمير وتأليف أوبري سولمون وبطولة كريس ويدج و كوين لا تيفا و راي رومانو بنشوف مغامرة جديدة لمجموعة الحيوانات الشهيرة لـIce Age فى محاولة منهم للهرب من سلسلة من النيازك اللى هاتضرب الأرض وتدمر الحياة على الكوكب كله.
الفيلم بيبدأ بمشهد افتتاحي للكائن الجميل (سكرات) واللى بيقدم صوته كريس ويدج فى سعيه الدائم لثمرة الجوز.. المشهد اللى بينتهي دايماً بكارثة وبينتهي أيضا بدون حصوله على وجبته المفضله.
المستوي التقني للفيلم كان عالى جدا، ومشاهد الحركة والمطاردات والإنفجارات فى الفيلم كانت متميزة لأنها كانت بتصور لنا غضب الطبيعة وازاي البيئة اللى حوالينا ممكن تكون أصعب عدو لو قررت عدم التساهل مع الكائنات اللى عايشة عليها.
الأداء الصوتي للشخصيات كان موفق، وحسينا أن كل شخصية درست كويس طبيعة الشخصية اللى بتقدمها علشان توصل بالأداء الصوتي لأفضل طبقة وأحساس ممكن.
بنعيب على الفيلم نقص الكوميديا وأحساسنا أن صناع الفيلم بيقدموا لنا جزء جديد فقط علشان يكون أسمهم قدموا جزء جديد من سلسلة Ice Age بكل ما يتبع القرار ده من أرباح وبروباجاندا.. لكن الجزء الجديد من السلسلة للاسف ماقدمش جديد علي العكس من باقى الأجزاء السابقة اللى حققت شهرة عظيمة للسلسلة.
دقة الرسومات والتحريك والابهار البصري كلها كانت عوامل رائعة وتحسب لصالح صناع الفيلم لكن على صعيد القصة والمحتوي نفسه كنا محتاجين نشوف عناصر ابهار اقوي من كده، وكنا محتاجين نحس أن الفيلم متعوب عليه أكتر من كده.
Ice Age فى الجزء الجديد منه –والأخير- يستحق المشاهدة من الأطفال، أما الكبار اللى عاوزين أكتر من مجرد كام مشهد كوميدي أو متوقعين أنيميشن قوي زي الأجزاء السابقة من السلسلة بننصحهم يفكروا مرتين قبل مشاهدة الفيلم.
