Incarnate : فيلم رعب بإسلوب جديد
فترة طويلة جداً مرت منذ أخر مرة شاهدنا فيها فيلم رعب فكرته جديدة ومختلفة عن باقي أفلام الرعب المتداولة واللى أصبحت مكررة الحبكة محفوظة القصة مُعادة من حيث الأداء التمثيلي والديكور والموسيقى.. علشان كده كان لازم نقول إن Incarnate فيلم مختلف من حيث الفكرة والتنفيذ.. وده اللى هانشوفه مع بعض دلوقت.
Incarnate من بطولة مارك ستيجر و بريان هالى و توماس أرانا و كير أودونيل و كارولينا ويدرا و مات نابلي ومن إخراج براد بيتون وتأليف روني كريستينسن.
الفيلم بيحكي عن رجل مشلول، عنده قدرة خارقة على الدخول لعقول البشر الممسوسين بمخلوقات شيطانية.. ومن خلال القدرة دي بيقدر يطرد الأرواح الشريرة من الناس الممسوسة. لكنه بيتعرض لتحدي من أحد الشياطين، واللى بيتجسد فى طفل عنده حوالى 11 سنة، وبيحول حياته وحياة أسرته لجحيم لا يطاق.
فى جانب كبير من الفيلم افتكرنا فيلم تاني لا يمت للرعب بصلة، وهو فيلم Inception من بطولة ليوناردو ديكابريو، وهو فى رأينا واحد من أفضل أفلام السينما وأكثر تعقيداً وتحفيزاً للعقل على التفكير والتمعن، والحقيقة إن فيلمنا واخد خيوط كتيرة من Inceptionوإن كان مش بنفس التركيز والتمعن.
الفيلم مش بيقدم مشاهد رعب كتيرة ومكثفة، لكن المشاهد اللى قدمها كانت كفيلة ببث الرعب فى قلوب المشاهدين، وعلى المقابل قدم مشاهد أكثر تحدياً للعقل وأكثر إشغالا له، بشكل نقدر نقول إنه بيقدم نوع من الرعب الهادف أو الرعب المختلط بمسحة من الخيال العلمي.
الموسيقى التصويرية لعبت دور مهم وحيوي فى الأحداث، وتجلت فى مشاهد الرعب علشان تقدم لنا التجربة كاملة ومتميزة ومخيفة الى اقصي حد، أما الديكورات فكانت متواضعة مقارنة بالموسيقى ووباقي عناصر الفيلم بشكل عام.
الأداء التمثيلي للأسف مكانش بقوة القصة والحبكة، ولو كان القائمين على الفيلم اختاروا طاقم تمثيلي أكثر احترافية كان ممكن يكون للفيلم شأن أقوى بكتير من اللى شوفناه فى النهاية.
Incarnate فيلم رعب بفكرة جديدة، ننصح بمشاهدته فى برودة ديسمبر، اللى هايزودها برودة الرعب فى الفيلم، ومخاطبته دماغ المشاهد قبل غريزته وخوفه الفطري من الأشباح والأرواح.
علشان تبقى عارف: تصنيف الفيلم على موقع IMDB الدولى للأفلام 5.2 من 10 وشارك فى الإستفتاء على الفيلم حوالى 2000 مستخدم للموقع.
