Instant Family: ميكس بين الكوميديا والمشاعر الإنسانية
قبل بداية عرض الفيلم في السينمات الأمريكية. خرج علينا مخرج الفيلم شين أندريز والمشارك في تأليفه. بتصريح بأن الفيلم مقتبس عن قصة حقيقية. وإن القصة الحقيقية اللي بيحكيها الفيلم هي قصته الشخصية! يمكن ده السبب الاساسي اللي خلانا نشعر أننا بمشاهدة فيلم Instant Family مش بس بنشوف قصة كوميدية. لكن إنسانية وعاطفية كمان.
Instant Family بيحكي عن أسرة بتقرر تبني 3 أطفال مرة واحدة. وفي البداية بتكون كل الأمور كويسة وبتقضي العائلة ما يعرف بإسم (شهر العسل) في العلاقة مع الأبناء. لكن مع مرور الوقت بتتحول كل الامور تحولات كبيرة بينتج عنها مواقف كوميدية لا تتوقف.
أبطال الفيلم مارك ويلبرج و روز بيرن قدموا أداء عادي متوقع منهم في النوعية دي من الأفلام. لكن عاجبنا تطور أداء مارك ويلبرج ومحاولته التنويع في أدوارة، وعدم رضاه بأداء أدوار الحركة فقط، لكنه بيتنوع بين الكوميديا والاكشن علشان يجرب تقنيات أداء مختلفة. وبينجح في أداء الشخصيات اللي بيقوم بيها على اختلافها. كمان ايزابيل مونر وجوستافو كويروز قدموا أداء مميز سواء على مستوى المشاهد الكوميدية أو المواقف الإنسانية اللي بيتعرض لها الفيلم.
على الرغم من الحبكة المكررة نسبيا في الفيلم، إلا أن طريقة تقديمها على الشاشة وتناول السيناريو لها وتطويرها جعل الفيلم جيد وشعور المشاهدين بصدق أحداثه أفضل. لكن بشكل عام لازم نقول أن الكوميديا كانت طاغية على الجانب الإنساني في الأحداث. وإن كنا نتمنى أن المنطقة الإنسانية تكون أكبر وليها اهتمام أكبر في السيناريو.
من الأمور اللي عجبتنا في الفيلم اختيار أماكن التصوير والإهتمام بتقديم كادرات سينمائية جيدة ومميزة. ودي كلها امور ساعدت على شعورنا بأحداث الفيلم بشكل أكبر. لكن من ناحية تانيه الموسيقى التصويرية كانت غير مؤثرة وتقليدية. لكن بشكل عام تركيز المشاهدين مش بيكون كبير على الموسيقى في النوعية دي من الأفلام.
Instant Family فيلم كوميدي إنساني. ونرشحه لكم للمشاهدة لو عاوزين تقضوا حوالي ساعة ونصف من الكوميديا مع لمحة انسانية قوية ولا يمكن تجاهلها.
