Into the woods : عندما تجتمع الاساطير
على اختلاف مستوياتنا الاجتماعية والمادية والثقافية، او حتي اللى فينا اتربى خارج مصر، كلنا لازم تكون مرت علينا ذكري كتير من الاساطير، سواء من خلال حكايات الجدات الطيبة حوالين الدفاية فى ليالى الشتاء، او من خلال حواديت قبل النوم من الأمهات اللى عاوزيننا ننام بسرعة، كلنا مرت علينا قصص زي ذات الرداء الاحمر، او سندريلا، او حتي قصة (جاك وشجرة الفاصوليا) ، وغيرها من الحواديت والاساطير.
من رحم النوعية دي من القصص، واعتمادا على دمج اكتر من اسطورة مع بعض، بيخرج علينا المخرج روب مارشال بفيلم غنائى استعراضى حميمي، بيجمع بين كل القصص الاسطورية اللى اتربينا عليها، مع عدد كبير من الاغاني والاستعراضات المبهجة واللى شغلت بالنا بمجرد دخولنا السينما.
بمشاهد افتتاحية اكثر من مبدعة، بنشوف قصة ذات الرداء الاحمر اللى بيرسلها القدر للغابة علشان توصل بعض الطعام لجدتها العجوز اللي مش قادره تتحرك، فى نفس الوقت بيقابلها الثعلب المكار اللى بيقرر يتخذها وجبة له على الغذاء، الامر اللى بيحبطه خباز فقير بينطلق للغابة فى محاولة لابطال لعنة بتمنعه من الانجاب، ومن هنا بندخل فى عدد كبير من الاساطير منها على سبيل المثال لا الحصر قصة سندريلا الجميلة اللى بتتعرض للاضطهاد من زوجة ابيها وبناتها القبيحات، وغيرها من القصص.
بما اننا بنتكلم عن فيلم غنائى استعراضي، لازم نقول ان الجهد المبذول فى الاغاني وتأليفها وكلماتها واستعراضاتها كان اكتر من رائع ، مجهود متميز واهتمام بالتفاصيل ومونتاج محكم، الاداء التمثيلي اللى قامت بيه ميرل ستريب فى دور الساحرة الشريرة كان مذهل، ونسينا تماما ان (ستريب) ظهرت فى دور الام اللى بتقترب من الموت فى August: Osage County فى دور من افضل ادوارها ايضا.
الاداء التمثيلى لباقى الابطال زي انا كيندريك فى دور سندريلا، جيمس كوردن فى دور الخباز الفقير، وزوجته ايملى بلانت وغيرهم، ايضا كان متميز وعظيم الى ابعد الحدود ، لكن لازم نقول اننا عند بعض المراحل فى الفيلم كنا بنصاب ببعض الملل من الاغاني على الرغم من روعتها ، لكن فكرة مشاهدة فيلم غنائى كامل بجمل حوارية محدودة او شبه مش موجوده، على الرغم من ثراء الفكرة الا انها اصابتنا ببعض الملل فى منتصف الفيلم، ويمكن ده العيب الوحيد اللى لاحظناه فى الفيلم.
نجاح الفيلم المعتمد على القصص المتأصلة فى وجداننا جميعا، والاغاني الحيوية والاستعراضات الدسمة، واصوات الكورال الممتزجة مع الكلمات الموزونة هايكون نجاح اسطورى وشبه مؤكد، وعجبنا جدا فكرة المزج بين اكثر من اسطورة قديمة مع بعض فى جو ساحر.
لو كنت من محبى الافلام الخيالية الفانتازية، او لو كنت من محبى الافلام الاسطورية وقصص الجدات القديمة، نوعدك بمشاهدة متميزة لفيلم متميز، لكن لو كنت من محبى افلام الاكشن اوالرعب، او كنت بتزهق من الأغانى والاستعراضات الممتدة على مدار الفيلم بالكامل، ننصحك تدور على فيلم تاني فورا . الفيلم ده مش هايكون ملائم ليك .
