It: Chapter Two : محاولة غير موفقة لاستغلال نجاح الجزء الأول
في الجزء الأول من سلسلة It كنا بنشوف مجموعة من الأصدقاء بتجتمع لمواجهة كيان شرير. وفي It: Chapter Two بنشوف نفس الأصدقاء بعد حوالي ٢٧ سنة بيجتمعوا للقضاء عليه من جديد. ده معناه أننا عارفين الإطار العام للأحداث ومش محتاجين ٣ ساعات علشان نفهم ده من أول وجديد!
في It: Chapter Two بنعرف أكتر عن فريق (الخاسرين) بعد مرور حوالي ٢٧ سنة على أحداث الجزء الأول. الفريق بيجتمع من جديد علشان يواجه المهرج الشرير بيني وايز اللي قام بدوره بيل سكارسجارد. واللي بييجي المرة دي بأستعداد أكبر وجرعة رعب أكبر.
فيما يتعلق بأفلام الرعب. احنا بنكون عارفين الحبكة والقصة اللي بتدور فيها الأحداث. وفي الغالب كمان بنكون عارفين النهاية. الحاجه الوحيدة اللي بتخلينا ندخل الفيلم هي أنتظارنا لسلسلة لا تنقطع تقريبا من مشاهد الرعب. مشاهد المفروض تخلينا مش عارفين ناخد أنفاسنا بشكل طبيعي من فرط الأنتظار. هل ده حصل في الجزء الثاني من It ؟
الحقيقة أنه حصل. لكن كان لازم نستنى لوقت طويل منذ بداية الفيلم علشان تبدأ الأحداث المرعبة. والوقت اللي قضاه الفيلم في رسم البناء الخاص به – اللي احنا أصلا عارفينه!- أخد وقت طويل نسبيا. وده من أهم عيوب الفيلم.
الأداء التمثيلي لأعضاء الفريق جيسيكا شاستاين و جيمس مكافوي و بيل هادير وباقي الممثلين كان مميز. كمان أختيار الشخصيات الكبيرة سنا خلانا نحس أنهم فعلا نفس الأبطال الصغار في السن. كمان جرعة الكوميديا في الفيلم خلتنا نشعر أن الفيلم فيه بعض النقاط الإيجابية اللي تخليه يستحق المشاهدة.
باختصار.. لو عجبك الجزء الأول من الأحداث فا It: Chapter Two هايبقى استمرار ناجح على نفس النهج. لو بس قدرت توقف نفسك عن الشعور بالملل نتيجة التطويل في بعض الأحداث.
