It Comes at Night: اعلان الفيلم ضحك على المشاهدين!
اعلان فيلم It Comes at Night بيحسسنا طوال الوقت أن فيه كائن ظلامي سواء كان شيطان أو شبح بيقرب من المنزل وهايبدأ في قتل أفراد العائلة. لكن الحقيقة غير ده تماما، وكان لازم الإعلان يكون صادق مع المشاهدين اكتر من كده علشان كتير من المشاهدين اللي شافوا الفيلم بناء على الإعلان شعروا بالخداع. تعالوا نتعرف اكتر على الأحداث.
القصة
الفيلم بيحكي عن أسرة بتتحصن داخل أحد المنازل هربا من خطر خارجي مجهول، لكن مع الوقت ومرور الاحداث بيبدأ الأشخاص الموجودين في المنزل يشعروا بجنون الارتياب والشك في دخول الاهوال اللي بتحصل في الخارج لداخل المنزل.
فريق العمل
الفيلم من تأليف وإخراج تيري إدوارد شولتز ومن بطولة جويل إجيرتون و كريستوفر أبوت و كارمين إجوجو و ريلي كيو.
الأداء التمثيلي
الأداء التمثيلي للأبطال كان جيد، وقدر كل واحد من أبطال الفيلم يضعنا في الحالة النفسية الخاصة به بشكل جيد ومناسب مع طبيعة الدور الخاصة به طبعا العبء الأساسي في التمثيل كان واقع على جويل إجيرتون واللي قدر يتحمل العبء ده ويوظف مشاعره كلها لخدمة دوره، ويقدم لنا أداء تمثيلي مميز يحسب له.
السيناريو والحوار والأخراج
يُحسب لسيناريو الفيلم أنه مش بيقدم لنا أجوبة على الأحداث بشكل مباشر، وبيورط المشاهدين معاه في منتصف الاحداث ويسيبنا لفترة بدون تقديم إجابات شافيه. الأسلوب ده في كتابة السيناريو بيعجب الناس اللي بتحب الغموض والتشويق، أما اللي عاوزين يشاهدوا فيلم واضح من أول مشهد لاخر مشهد بدون أي فرصة للاستنتاج أو التفكير، هايضايقهم الأسلوب ده في السيناريو، أما الحوار في الفيلم وعلى الرغم من قلته لكنه كان قوي وتم توظيفه بشكل جيد، وكل الأمور دي تحسب للاخراج اللي على الرغم من وجود بعض المشكلات فيه وعدم تمكنه من توظيف الحبكة فيه بشكل كويس لكنه في النهاية قدر يصنع فيلم مشوق ويستحق المشاهدة.
الديكورات والموسيقى والأزياء
ديكورات الفيلم كانت اكتر من رائعة ووقع عليها عبء شعورنا بالرعب في بعض المشاهد، لكن الموسيقى التصويرية كانت محتاجة تكون اقوى وأفضل من كده. وحسينا ببعض من عدم اهتمام بالموسيقى في الفيلم على حساب باقي العناصر.
الخلاصة
It Comes at Night فيلم مناسب للمشاهدين اللي مش عاوزين ياخدوا أجوبة مباشرة وجاهزة على اسئلتهم بخصوص الأحداث.
علشان تبقى عارف:
مخرج الفيلم تيري إدوارد شولتز هو أيضا مخرج فيلم Krisha
