Jack Reacher: Never Go Back : جزء جديد من سلسلة قوية
من الواضح إن توم كروز أصبح من محبى فكرة سلاسل الأفلام… الموضوع بدأ بسلسلة أفلام المهمة المستحيلة Mission Impossible واللى حقق نجاح طاغي على مستوي كل دول العالم ويعتبر من أشهر سلاسل الأفلام فى التاريخ… توم هانكس كان بيلعب فى السلسلة دور إيثان هانت العميل الميداني اللى بيواجه فى كل فيلم مغامرة جديدة بتحبس الأنفاس… ومن الواضح إن نفس النجاح هايكون حليف السلسلة الجديدة Jack Reacher .
الجزء الثاني من السلسلة من إخراج ادوارد زويك وبيشارك فى بطولته بالإضافة لكروز كوبي سمولدرز و دانيكا يا روش و روبرت نيبر.
الفيلم مقتبس من سلسلة روايات بتحمل نفس الإسم للمؤلف لى تشايلد، واللى بيقدم شخصية المحقق جاك ريتشر واللى بيواجه فى كل رواية من رواياته تحدي جديد ومغامرة جديدة ضد قوي الشر اللى بتدير العالم فى الخفاء.
الجزء الجديد بيحكي عن مغامرة جديدة لجاك ريتشر بيحاول الحفاظ فيها على نظافة إسمه وسمعته من مؤامرة حكومية ضخمة ومتشعبة ومتغلغلة فى الولايات المتحدة كلها.. فى سبيل الخروج من الأزمة بأمان ريتشر بيضطر يتعامل بعنف مبالغ فيه، وبيضطر كمان يهرب من السلطات الحكومية اللى بتحاول تطارده طوال الوقت.
الأداء التمثيلي والبدني لتوم كروز كان متميز.. وعلى الرغم من تقدمه فى السن إلا إن إخلاصه وتركيزه لتقديم مشاهد أكشن قوية ومتميزة كان ظاهر جدا فى كل تفاصيل الفيلم من البداية للنهاية. لكن الأداء التمثيلي لباقى فريق العمل مكانش بنفس قوة تمثيل كروز، واللى كان واضح إستحواذه على اهتمام كل عناصر الفيلم بشكل مش بيسمح لأي ممثل تاني أنه ياخد منه فرصة الظهور أو تقديم مشاهد قوية الا فى عدد قليل من المشاهد.
لو ها نتكلم عن صاحب الفضل رقم 2 بعد وجود توم كروز فى البطولة لنجاح الفيلم هاتكون بالتأكيد الموسيقي التصويرية المتميزة واللى حسينا بقوتها بمجرد مشاهدة التريلر الخاص بالفيلم، واللى قدرت تقدم جو من التشويق والتركيز فى أحداث الفيلم، وتناغمت مع مشاهد الأكشن خصيصاً علشان تخلق جو من التحفز والترقب بداخلنا لكل أحداث الفيلم من البداية للنهاية. أما الديكورات وعلى الرغم من قوتها لكنها ماقدرتش تعطينا انعكاس قوي وحقيقي للأماكن اللى بتدور فيها الأحداث رغم الجهد المبذول فى خروجها بالشكل المناسب.
الجزء الثاني من سلسلة أفلام Jack reacher حقق نجاح كبير فى دور العرض، وسمعنا إنه تم عرضه فى أبو ظبي قبل الولايات المتحده! وهى مش ظاهرة بتحصل لأول مرة لكن دايماً أفلام توم كروز بيكون لها نصيب كبير من العرض فى المنطقة العربية قبل الولايات المتحدة، كمان كروز واقع فى غرام الشرق بعد تصوير كتير من أعماله فى المنطقة العربية زي دبي والمغرب وغيرها.
Jack Reacher فى جزءه الجديد بيقدم جرعة أكشن متميزة.. ماتفوتكمش فى السينمات.
