Jackie : مابعد اغتيال كينيدي

حوادث اغتيال الرؤساء والشخصيات الهامة والعامة، بتثير كتير من اللغط والكلام، وبتنشط بخصوصها نظريات المؤامرة، خاصة لو كانت عملية اغتيال غير مفهومة حتي اليوم، زي عملية اغتيال الرئيس الأمريكي الأسبق جون كينيدي واللي لم يتم كشف أبعادها أو أسبابها الحقيقية وأسماء المتورطين فيها بشكل كامل، وإن كانت أصابع الإتهام بتشير طوال الوقت لناس كانت مستفيدة أيامها من عملية الإغتيال.

فيلم (جاكي) من إخراج بابلو لاراين وتأليف  نواه إوبينهايم ومن بطولة  ناتالي بورتمان و بيتر سارسجارد و جريتا جيروج و بيلي كرودب. والفيلم بيحكي عن جاكلين كينيدي –بتلعب دورها ناتالي بورتمان- زوجة الرئيس الأسبق، واللي كانت راكبه السيارة بجواره لحظة تنفيذ عملية الأغتيال، ومشاعرها في اللحظة اللي وجدت فيها أشلاء زوجها بتتناثر عليها بعد اصابته برصاصة قناص في الدماغ، أمام ألاف المعجبين والمتجمهرين سنة 1963

الفيلم مش بيركز علي كينيدي أو نجاحاته واخفاقاته، أو حتي مقتله واغتياله، إلا من زاوية الزوجة، ورد فعلها علي الأحداث، وإحساسها قبل وبعد الأغتيال، لكنه مش بيناقش قضية الأغتيال نفسها أو المتورطين فيها، إلا في جزء يسير جدا من الأحداث.

الأداء التمثيلي لناتالي بورتمان كان أكتر من رائع، وقدمت تحكم مميز في طبقة صوتها وحركة عيناها وجسدها، والحقيقة أن ناتالي أثبتت تمكنها من أدواتها كممثلة قادرة تتقمص الشخصية المطلوبة منها باحترافية وذكاء تحسد عليه.

لكن لأن الأداء التمثيلي مش كل شيء، سيناريو الفيلم المشتت بين حادثة الإغتيال وبين حياة جاكلين نفسها، وبين محاولة تقمص خط الفيلم التاريخي اللي بيحكي عن أحداث معينة، وبين الفيلم الإنساني اللي بيحاول يفسر ما وراء الأحداث، فشل السيناريو في الثبات علي خيط واحد، ودي كانت نقطة ضعف كبيرة في الفيلم.

علي الرغم من قدرة الموسيقي التصويرية علي تحويل الفيلم لقطعة فنية متميزة، لكن الموسيقي في حالة فيلمنا كانت ضعيفة وغير مؤثرة، علي العكس من الديكورات اللي نقلتنا زمنيا لحقبة الستينات، والأزياء والملابس اللي عبرت بدقة عن حقبة زمنية تميزت بموضتها المختلفة والغريبة في الملابس.

للأسف فيلم جاكي اغفل تناول شخصية جاكلين كينيدي فيما هو أبعد من حادثة الأغتيال، ولم يتناول حياتها وزواجها من الملياردير أرسطو أوناسيس، أو مشاكلها فيما بعد مع الصحافة، وغيرها من الأحداث اللي من الممكن يكون صناع الفيلم حسوا أنها غير ملائمة أو هاتفسد جمال الشخصية اللي بيتكلمو عنها.

فيلم (جاكي) كان ممكن يكون فيلم أكتر تميزا، لو كانت باقي عناصره وخاصة السيناريو بقوة الأداء التمثيلي لناتالي بورتمان.

علشان تبقي عارف:

تقييم الفيلم علي موقع IMDB 7 من 10 وشارك في التصويت حوالي 31 ألف مستخدم للموقع.