Jason Bourne : مغامرة جديدة فى عالم المخابرات
لو عاوزين نتفرج على فيلم بينقل اللى بيحصل فعلا فى عالم الصراع بين أجهزة المخابرات.. مش ها نلاقى أصدق أو أوقع من سلسلة أفلام Jason Bourne … الحقيقة إحنا مش فاكرين مين بالظبط صاحب التصريح ده.. لكن اللى نعرفه كويس انه تصريح صحيح تماما.. وإن ده كمان كان شعورنا وأحنا بنتفرج على سلسلة أفلام (جيسون بورن) كلها تقريباً.
من تأليف وإخراج بول جرينجراس ومن بطولة مات ديمون و تومي لي جونز و جوليا ستايلز بنشوف فصل جديد من فصول حياة عميل جهاز المخابرات الأمريكي CIA السابق جيسون بورن… وازاي بيظهر من جديد تحت أعين أجهزة المخابرات، بعد ما نجح تماماً فى الهرب منها والأختفاء عن أبصارها فى الجزء السابق.
ظهور جيسون بورن من جديد وملاحقة أجهزة المخابرات له بيتقاطع مع خطوط درامية تانيه زي رغبته فى الكشف عن معلومات عائلية خاصه بيه، الأمر اللى بيخلي رحلته تتقاطع مع نيكي بارسونز علشان يدوروا مع بعض على اللى ناقصهم.
سيناريو الفيلم مافيهوش جديد عن باقى الأجزاء… ظهور مفاجىء وأسطوري لجيسون بورن ثم مشاهد مطاردات وأكشن وصراع يدوي وتبادل إطلاق نار ثم بعض الغموض… الخ لكن الحقيقة أن على الرغم من عدم تجديد السيناريو الى اننا استمتعنا وحسينا اننا أخدنا بالظبط اللى كنا بندور عليه… شويه أكشن وشويه تشغيل مخ مع كتير من الإسقاطات السياسية وبيان العلاقة بين الأجهزة الأمنية والقائمين على مواقع التواصل الأجتماعي.
على صعيد الموسيقي التصويرية والديكورات لازم نعترف أن الفيلم كان متميز وقدر ينقلنا بديكوراته المتقنة للمنطقة الجغرافية الخاصة بكل اشتباك وكل معركة فى الفيلم، كمان الموسيقي التصويرية لعبت دور مهم علشان نقدر ندخل عالم الأحداث الخاصة بالفيلم بسهولة وسرعة، والموسيقي كانت عارفه امتي تكون مكثفة وامتي تختفي علشان نقدر نستمتع بالأحداث أكتر.
عجبنا فى الفيلم التركيز على شخصية بورن وعلى ماضيه العائلي.. وبنعتقد أن دي بداية تمهيد لأجزاء قادمة من السلسلة هايتم التركيز فيها على أبعاد أكتر إنسانية من شخصية جيسون بورن، لكن طبعاً بدون نسيان الأكشن ومشاهد الإشتباك اللى تعتبر من الأمور المميزة للفيلم.
الجزء الأحدث من سلسلة أفلام جيسون بورن أعطانا بالظبط اللى بندور عليه : حوالى ساعتين من المتعة والأكشن والمطاردات مع خيط درامي بسيط لكن قوي ومتماسك.. ونقدر نقول أننا بانتظار الأجزاء القادمة من السلسلة بنفس الشغف والمتعة اللى كنا بانتظار الجزء الحالى منها.
